4-5 декабрьыште начар тазалыкан самырык-влак коклаште «Мы вместе!» адаптивный ӱстембал модыш дене спартакиаде лийын.
Тудым «Мы вместе!» проект почеш студент-волонтёр Д.Киртаев ден Российысе инвалид-влак обществын Марий Элысе пӧлкаже пырля эртареныт. Дмитрий тиде проектым ямдылыме дене «Росмолодёжь. Гранты» конкурсын икымше тургымыштыжо сеҥен.
Мероприятий шкешотан форматан лийын. 102 участник «Новус», «Шаффлборд», «Кульбутто», «Джакколо», «Рошфор» ӱстембал модышла дене шке вийыштым да моштымашыштым тергеныт.
Спартакиадыште тӱнямбалысе калык-влакын ӱстембал модышышт дене модаш СВО-н инвалид-участникше-шамычат ушненыт. Вет эртыше кеҥежым «Защитники Отечества» фондын Марий Элысе филиалже ден Российысе инвалид-влак обществын Марий Элысе пӧлкаже ойпидышым подписатленыт.
Тӱҥжӧ – вий-куатан лияш да илышым йӧраташ. СВО-н ончычсо участникше-шамычым тыгай ошкылым ыштымышт дене саламлаш филиалым вуйлатыше Р.Магсумов миен коштын.
«Мемнан республикыштат спортын адаптивный видше-влакын вияҥмышт куандара. Спартакиадыште улшо спортсмен-шамыч, тыгодымак спецоперацийын ветеранже-влак, айдемын кӧргӧ вийже улмым пеҥгыдемдат, сандене кажне участникше сеҥыше», – каласен Ренат Зуфарович.
Тыгак тудо ӱстембал модышышто икымше гана шке вийым тергыше СВО-н ветеранже-влак Алексей Суворов ден Александр Николаевым саламлен да, сай лектышыш шуыда манын, ӱшан дене ойлен. Вет шукерте огыл А.Суворов «Кубок Защитники Отечества» таҥасымаш гыч кок шӧртньӧ медаль дене пӧртылын.
Уфаште 21-23 ноябрьыште эртаралтше ты таҥасымаште Марий Элын сборныйыштыжо индеш еҥ лийын. А сай результатым Алексей Николаевич гына ончыктен кертын. СВО ветеранна ӱстембал теннисыште да SH2 классан пулевой лӱйкалымаште икымше лийын.