4 ноябрь – Шке верч азапланыме кече.
Шукыж годым ме шке нерген мондена. Пашам ыштена, ешыште чыла могырымат сай лийже, икшыве-шамыч пиалан кушкышт манын тургыжланена. Южгунамже икмыняр еҥ деч «таче жап эртен, йӧра веле» манмымат колаш лиеш. Йолташ-влак, тиде кече шотышто тендан шонымашда могай?
Людмила ГРИГОРЬЕВА, Йошкар-Ола:
– Кажне еҥын эн тӱҥ поянлыкше – тиде илыш. А илыш тунам пиалан лиеш, кунам тыйын тазалыкет пеҥгыде. Чыла воранен толжо манын, тудым эре перегыман. Тунам ыштышаш сомылат шукталтеш, шинчаончалтышат пӱсырак лиеш, еҥ-влакланат йывыртет, пӱртӱс поянлыкымат йӧратен вашлият. Такшым шкем аралыме шотышто тӱрлӧ семын азапланыман: уш-акыл, моторлык да моло шотыштат.
Вячеслав ОСИПОВ, Волжский район:
– Мыйын шонымаште, айдеме шкеж верч эре азапланышаш. Тудо шке лӱмжым, чапшым, тазалыкым, йӧратымашым йомдарышаш огыл. Тиде шонымаш дене шкенжым чын корныш
шогалташ идалыкеш ик гана огыл, кажне кечын шонышаш. Кажне кечын могай поро сомылым ыштен, кӧлан сай мутым ойлен, кид, мут дене эҥертыш, ӱшан лийын, могай куаным еҥлан конден, иктешлышаш. А шкаланже пуымо куанже – эн чын, эн кугу. Кунам айдеме шкеж нерген шона, порылыкым шара, тудо пагалымашым сула.
Виктория ЯКОВЛЕВА, Йошкар-Ола:
– Шке нерген эре азапланыман. Эн ончыч тазалыкым перегыман. Арулыкым эскерыман. А кызытсе пандемий жапыште поснак тӱткӧ лийман да шкем аралыман. Иктаж-куш каяш ямдылалтыда гын, маскым налаш мондыман огыл. Антисептикым кидыш йыгалтыман. Арулык нерген нигунам мондаш огеш кӱл. Калыкыште таклан огыл ойлат: «Таза капыште – таза чон». Аралыза, йӧратыза шкендам.
Лиана СМИРНОВА, У Торъял:
– Эре пашам ыштена. Южгунамже каналташат жап уке. А тиде пайрем шке нерген шоналташ амалым луктеш. Илышнаже икте веле да кӱчык. Сайым ыштен да куанен илыман. Нелылыкым ончыде, тыгай кече улмо нерген шарныман. Ме икте-весылан порылык ден куаным кондышаш да тидлан тунемшаш улына. Кажне еҥ шкенже дене кугешнен да весылан сайым ыштен кертеш.
Алиса СТЕПАНОВА, Йошкар-Ола:
– Кызытсе илышыште шкем поснак аралыман да тазалык верч азапланыман. Таза, пеҥгыде капкылан да чонан лият гын, воктене илыше лишыл еҥет-влакланат куштылго. А икшыве-шамыч ынышт тургыжлане манын, тазалык верч тыршыман. Нунылан эре таза ача ава-влак кӱлыт.