Еҥ икшывым кузе воспитатлыман?
Тидын шотышто Йошкар-Оласе психолого-педагогический, медицине да социальный полышым пуымо «Детство» рӱдерын социальный педагогшо О.Н.Кузьминых тыгай ойкаҥашым пуа:
Мом палыман?
- Икшыве могай, тугайым йӧратыза. Кеч-мо лиеш гынат, йоча палышаш: те тудым йӧратеда.
- Йочан мо нерген шонкалымыжым, тудлан мо кӱлмым, молан шкенжым вес семын огыл, а тыге кучымыжым умылаш тыршыза.
- Икшывылан ӱшандарен ойлыза: тудо шке вийжылан, шканже ӱшана да тырша гын, кеч-могай шонымашыш шуэш.
- Йоча кеч-могай уда койышыжым ончыкта гын, эн ончыч шкем титаклышаш улыда. Те икшывым воспитатледа.
- Тыгай ийготан улмыда годым шкендам кузе кучымым чӱчкыдын шарналтыза.
- Шарныза: икшыве шомакым колыштын огыл, а тендан ончен воспитатлалтеш.
Мом ыштыман огыл?
- Икшывыда эн сай да чыла ыштен моштышо лиеш манын ида шоно. Тудо моло деч сайжат огыл, удат огыл. Йочада – весе, ойыртемалтше.
- Йочам «сбербанк» семын ида уж. Ача-ава-влак ньогаштым йӧратат, чаманат, варажым чыла тидым процент семын мӧҥгеш пӧртылташ йодыт.
- Ешышке ончаш налмылан, ончен куштымылан тау мутым ида вучо. Икшыве тендан деч тидым йодын огыл.
- Йоча илыш нерген тендан семын шонаш тӱҥалеш манын ида шоно.
- Тудым шке ончен-куштышаш улыда, а туныктышо, коча-кова огыл.