13-19 август марте Сахалиныште «ОстроVа» молодёжный форум эртаралтын.
Тушко элнан тӱрлӧ регионжо гыч 500 еҥ погынен. Кодшо кечылаште «Маяк» арт-резиденцийыште Росмолодёжьын экспертше-влаклан 100 тӱрлӧ социальный проектым аклаш луктыныт. Марий Эл гыч тушко Ольга Пидыбаева ден Лидия Музурова каеныт.
Лидия Музурова – МарГУ-што самырык еҥ-влак дене пашам ыштыше специалист. Форум нерген тудо тыгерак ойла.
– Форум тӱрлӧ мероприятийлан да туныктымо программылан поян. Кажне кечын кейс да проект дене пашам ышташ туныктат. 14 августышто участник-влак шке пашаштым араленыт, 16 августышто комиссийыште улшо эксперт-влак дене вашлийынна. Нуно проект пашанам изиш тӧрлаш ой-каҥашым пуэныт. Тышке мый «Женское сообщество по саморазвитию «W.club» проект дене миенам. Кызыт ӱдыр-влак «мӧҥгӧ – паша – мӧҥгӧ» режим почеш илат. Тыгодым икте-весе дене мутланашат жап огеш сите. Мыйын проект пашам ӱдыр-влаклан икте-весе дене палыме лияш, иктаж-молан тунемаш, тыглай илыш гыч изиш кораҥаш йӧным пуа.
А кастене тӱвыра программе лийын. 15 августышто верысе артист-влак шке мастарлыкыштым ончыктеныт. Тыгак тушко «Приехали» шоун вӱдышыжӧ Дмитрий Красилов, «Таврида.Арт» форумын резидентше Андрей Ёлгин, Mary Gu мурызо толыныт ыле. Вес кечынже «Горный воздух» горнолыжный комплексыште мероприятий эртен. 17 августышто Охотский теҥыз сер воктене лийынна.