Морко район гыч Артём Григорьев компьютерлан изинек шӱман. Шымше классыште тунеммыж годым ача-аваже тудлан компьютерым налын пуэныт. Тылеч вара рвезе информатике урокыш эшеат чот йӧратен коштын. А.Григорьевын кызытсе пашажат компьютер денак кылдалтын.
Пургедаш йӧратен
Артём Шӱргӧ ялыште шочын. Тӱҥалтыш класслам Шлань школышто, вара Унчо школышто тунемын.
– Компьютерыште пургедаш изинек йӧратем. Школышто информатике урок деч посна алгебр ден геометрий, физкультур келшеныт. Ече дене таҥасымашлаште классын чапшым чӱчкыдын араленам.
Школышто тунеммем годымак илышем компьютер дене кылдаш шоненам да 11-ше класс деч вара МарГУ-н студентше лийынам.
Палымем-влак открытый образований да информационный системе-влак институтышто кугурак курслаште тунемыныт. Нуно ты институт нерген каласкаленыт. Специальностем «Математическое обеспечение и администрирование информационных систем» маналтеш. Тунемаш куштылго огыл ыле, программирований дисциплине ик эн нелын чучын. Но мыланем чылажат оҥай лийын, – каласкала А.Григорьев.
Шкаланже шке оза
Кызыт Артём Озаҥ олаште ила. Тудо, эрдене кынелын, паша верышкыже ок вашке. Паша верже – мӧҥгыштак. Рвезе самозанятыйлан шотлалтеш, шкаланже шке пашам ышта. Тудо маркетолог: сайт-влакым ышта, рекламым вераҥда. Вес семын каласаш гын, бизнес аланыш клиент-влакым савыраш полша. Ик сайтым ышташ кок арня наре жап кӱлеш, южгунам утларакат.
Такшым гын Артёмын паша корныжо ик компанийыште тӱҥалын, рвезе тушто программистлан ыштен, вара вес вере системный администратор лийын. Икмыняр жап гыч сатум але услугым ужалыме сайт-влакым ышташ тӱҥалын. Компанийыште маркетологын паша гыч кайымекше, Артёмлан тудын сомылжым шукташ темленыт. Тыге рвезе рекламе дене пашам ышташ тӱҥалын, тиде направленийыште моштымашыжым шуарен. А кок ий гыч Артём тушеч каен да шкаланже шке оза лияш шонен пыштен.
– Ончыч клиент-влак дене мо да кузе лийшашым каҥашена, вара пашалан пижам, – манеш Артём.
Весымат туныкта
Тӱҥалмыж почеш рвезе увертарымаш сайтлаште клиент-влакым кычалын, нунылан йыҥгыртен, шке пашажым темлен гын, кызыт тудын дек утларакшым шке йыҥгыртат. Клиент-влак тӱрлӧ вер: Моско, Санкт-Петербург, Екатеринбург, Сочи, Озаҥ да моло ола – гыч улыт.
Жапше лийме годым А.Григорьев кумылан-влакым сайтым ышташ, клиентлан чын ужалаш, кажне этапыште шкем кузе кучаш туныкта. Тунемшыже-влак ятыр лийын огытыл гынат, рвезе тиде сомылым ынеже кудалте.
Канашат тырша
Артёмлан мӧҥгыштӧ пашам ышташ келша. Но компьютер ончылно кужу жап шинчен ноялтеш, шерат темеш.
– Тыгай годым ноутбукем пелен налам да иктаж-могай кафеште але ужалыме рӱдерыште пашам ыштен шинчылтам, – манеш рвезе.
Паша деч канаш тудлан футбол полша. Арняште кок гана йолташыже-влак дене мечым поктылеш. Эше тудлан йолын кошташ йӧрата.
Ончыкылыклан план нерген йодмемлан рвезе тыгерак вашештыш: «Шкалан шке пашам ыштыше еҥын лишыл жаплан планже, цельже эре лийшаш. Ончыкыжым тиде аланыштак пашам ышташ, шке компанийым почаш да вуйлатыше лияш шонем».
А.Григорьевын альбомжо гыч налме фото.