Мужедын моштымылан, ю шӱлышлан ик ганат ӱшанен омыл. Но илышыштем умылтараш лийдыме кок случай лийын.
Икымшыже – эше студент годымак. Олаште тунемынам, кажне каныш кечылан ача-авам дек ялыш кудалыштынам. Мончаш олтенна, авам кажне мийымемлан тутло сийым ямдылен, чайым йӱын, кухньышто кутырен шинчылтынна. А эше мыйым мӧҥгыштӧ Черныш лӱман шем пырысем вучен. Тудо йол мучаштем эре пырля мала ыле.
Ик тыгай кечын мончаш пурен толмеке, авам дене кутыркален шинчышна да малаш вочна. Мален колташ тӱҥалынам ыле, трук кроватьыш Черныш тӧрштен кӱзыш. Йол мучаште тошкышто, шкенжым эрыктыш да пурен возо. Пырысем воктекем пыштышаш манын шонен, кынел шинчым да йол мучашке кидем шуялтышым – нимо уке. Лӱдмем дене кычкыралынат колтышым. Кузе тыге?! Мый тудын нелытшым йолем дене шижынам, тарванылмыжым колынам… Йӱкем колын, авам куржын толын. Каласкалымекем, тудо суртводыж, докан, иктаж-мом шижтарынеже манын вашештыш.
Кок тылзе гыч медосмотр годым шодыштем шем тамга-влакым верештыныт. Тунеммым ик жаплан кодаш логалын: академический отпускым налынам да ик ий наре эмлалтынам.
Кокымшо случай икмыняр ий эртымеке лийын. Тунам мый марлан каенам, икшывына шочын. Изи ӱдырем дене тылзылан ик гана ача-авам деке уналыкеш кудалыштынна. Икана ялыш мийымына годым кастене вочна веле, ӱдырем мален колтыш. Мыйымат омо темдаш тӱҥале. Шкеже малем, но чыла шижам-колам. Пуйто койкына воктене ала-кӧ коштеш. Кынел шинчым, почмо омса гыч зал могырым изи ӱдыр мемнан деке лишемеш. Тудо ӱдырем деч кугурак капан, шкеже каҥга, ӱпшӧ шала, ош тувырым чиен. Тыгай йочаже мемнан дене кушечын, шонем. Туддеч йоднем, но умшам почын ом керт, пуйто тӱрвем вашла пижын. А изи ӱдыр эркын лишемеш, кугу шем шинчаж дене мыйым онча. Лӱдмем дене тӧрштен кынельым да пӧлем омсам вашке гына петырышым, шке семынем молитвам лудаш тӱҥальым.
Кум кече гыч йочам черланен, температуржо чот кӱзен, укшинчын. Эмлымверыште тергалтмеке, скарлатине диагнозым шынденыт. Йӱдым ужмо саде изи ӱдыр чер нерген шижтарен мо вара?
Елизавета.
Йошкар-Ола.