Марий аварийно-утарыше службын утарышыже-влак шижтарат: йӱштӧ игечыштат южо вере ий вичкыж.
Йошкар-Олаште ий 30 см марте кӱжгытан, кӱвар-влак йымалне – 35-30 см марте. А Ширяйковысо понтонный кӱвар дене – 10 см марте гына. Кокшайскыште Юл 24-34 см марте кылмен, затонышто – 34 см марте. Волжск олаште – 26 см марте, затонышто – 28-35 см марте.
Козьмодемьянскыште порт кундемыште ийын кӱжгытшӧ 20-25 см марте шуын, паром дене вончымо верыште – 15 см марте. Ийыште шуко лум, а лум йымалне – вӱд. Шуко лум ийлан кылмаш чаракым ышта.
Юринысо Юл эҥерыште ий 20 см кӱжгытан. А Звениговысо затонышто 35-40 см марте кылмен гынат, йоген кайыме верлаште вӱд койылалта.