Медведево район Нурма тӱвыра рӱдерыште кажне кечын илыш шолеш. Тыште мурышо да куштышо ансамбль-влакын репетицийышт чӱчкыдын эртаралтеш, йоча-влаклан тӱрлӧ кружок уло. Тӱвыра рӱдерын пашаже, ончыкылык планже нерген вуйлатышын пашажым жаплан шуктышо Елена Анатольевна Петрова каласкала.
Йоча-влакым шуара
Тудо рӱдерыште 17 ияшак пашам ышташ тӱҥалын, тӱрлӧ кружокым вӱден. Тӱвыра аланыште тыршымыжлан тений – 22 ий. Е.Петрова – чыла шотыштат уста специалист. Йочаж годым кушташ йӧратен, садлан ончыч шкенжым хореограф профессийыште веле ужын. Но пӱрымаш вес векыла савыралын. И.С.Палантай лӱмеш тӱвыра да сымыктыш колледжын хоровой пӧлкаштыже тунемын. Вара кӱшыл образованийым МарГУ-што налын – этнокультурный рӱдер-влакым вуйлатыше специалист лийын. Тылеч посна университетыште Юл да Чолман эҥерла воктене илыше калык-влак шотышто специалистлан магистратурым тунем пытарен. Елена Анатольевна палдара:
– Тунемаш йӧратем. Тидын дене шинчымашем келгемдем, уло моштымашем йоча-влаклан пуэм. Ныл кружокым вӱдем. Кум ияш йоча-влак ритмике кружокыш коштыт. Тушто семым колышташ тунемыт. 13 йоча рисований кружокыш толеш. Тушто шун дене тӱрлым ненчена, куэмым, кагазым, фломастерым, карандашым, порым, чиям кучылтын, сӱретлаш тунемына. Икманаш, сымыктыш тӱнясе тӱрлӧ техникым шымлена. Нурма тӱвыра рӱдерыштына гимнастике кружок уло. Ме профессионал огынал, сандене йоча-влак куштылго гимнастике упражнений-влакым веле ыштат. Тидыже тазалыкыштым пеҥгыдемдаш сита, шонем.
Хореограф лияш йоча годсо мшонымашыжым ӧрдыжеш коден омыл. Куштышо коллектив-влак дене пашам ыштем. Икмыняр куштышо ансамбльна уло. Тӱрлӧ ийготан ӱдыр-рвезе-влак, мутлан, «Сияние звезд» ансамбльыш кумылын коштыт. Марий, руш, эрвел куштымаш-влакым куштат. Республикысе да Российысе тӱрлӧ мероприятийыште, фестивальыште мастарлыкыштым ончыктат.
Изи гына улыт, а семӱзгарым устан шоктат
Нурма тӱвыра рӱдерыште чылаже кум специалист: вуйлатышын сомылжым жаплан шуктышо Е.Петрова, аккомпаниатор А.Ермаков, хормейстер Т.Афанасьева – да техслужащий пашам ыштат.
Ончыч рӱдер пелен марий ансамбль-влак лийыныт, кызыт гын уке. Но Елена Анатольевнан мутшо почеш, тиде экшыкым тӧрлаташ шонат да Нурма вел марий семым кундемыштына калык палыже манын, мурышо да куштышо ансамбльым чумырынешт.
Марий сымыктыш тӱням пойдарымаште хормейстер Татьяна Юрьевна Афанасьева 16 ий тырша. Тудо йоча хорым чумырен. Районышто тӱрлӧ патриотический, тӱвыра мероприятийыште чӱчкыдын мурат. Тыгак «Шиялтыш», «Изи шӱшпык» семмастар, «Рябинушка» мурышо ансамбль-влакым поген. Татьяна Юрьевна каласкала:
– «Шиялтыш» ансамбльыш Нурма ял шотан илемыш пурышо икмыняр ял гыч йоча-влак коштыт. Нуным школ автобус Нурмаш шупшыкта. Сандене палемдыме жапыште чылаж годым йоча-влакым тичмашнек поген огыт керт. Арнялан ик гана 40 минут занятийым эртарена. Тидыже, конешне, шагал. Садлан каныш кечылаштат репетицийым эртараш тыршем. Чылаже – 5 йоча ансамбльын участникше. Ныръял гыч Коротковмыт еш пеш чолга улыт. Кум икшывышт ансамбльыш коштеш. Кок участник Салтак Корем ял гыч. Иктыже – тӱмырзӧ.
«Изи шӱшпык» совлам перкалыше ансамбльым 2016 ийыште чумырымо. Ончыч кок класс коштын гын, кызыт шагалрак. Туге гынат шке мастарлыкышт дене уло калыкым ӧрыктарен да куандарен кертыт. «Шиялтыш» ден «Изи шӱшпык» ансамбль-влакат ятыр конкурсын лауреатше улыт.
А «Рябинушка» ансамбль Марий Элыштына шукылан палыме докан. Теве шукерте огыл коллектив Киров кундем Санчурск посёлкысо тӱвыра да каныме рӱдерыште «Моя малая Родина» калык усталык да Виче-Марий келшымаш регион кокласе фестивальыште участвоватлен. 17 коллектив кокла гыч «Рябинушка» кокымшо верым налын.
Тӱвыра рӱдерыште паша шолеш, адакшым тыште Нурма вел марий калыкын илыш-йӱлаже, ыштыш-кучышыжо, вургемже дене палдарыше ятыр экспонат уло. Чыла шот дене радамлен, фойеште тоштерлан посна лукым ойыраш шонат.
Фото-влак И.Речкинын да архив гыч налме.