5 майыште «Шишор» марий калык фольклор ансамбль шкенжын 65 ияш лӱмгечыжым пайремлыш.
«Шора вӱд воктен илыше улына, эҥыж чайым йӱына», – манын мурат тысе Арск районвсо Шорамучаш ял калык. Икымше ошкылым 1956 ийыштак ыштыме. Ансамбльлан негызым Тукташ Туйбатрович Туйбатров пыштен. Ялын ончычсо лӱмжым арален кодаш манын, ансамбльлан «Шишор» лӱм пуалтын. «Шишор» мут ший вӱд манмым умылтара. 1991 ийыште ансамбльлан калык лӱм пуалтеш. «Шишор» Арск районышто гына огыл, республикыштат эртаралтше шуко фестиваль ден конкурслашке ушна.
Ансамбльын лӱмгечыж дене Арча тӱвыра пӧртын директоржо Айрат Гумарович Нурьязановат саламлыш, творчествыште кугу сеҥымашым тыланыш. Ансамбльын вуйлатышыже Олеся Антиповалан Арск район вуйлатыше Ильшат Габдельфартович Нуриев да тӱвыра управленийын начальникше Ильфар Ильдарович Аюпов лӱм дене Тауштымо серышым пуыш. Ансамбльышке шуко ий коштшо участник-влакат пӧлек да Таумут деч посна ышт код. Лӱмгече пайрем саламлымашлан, муро-куштымашлан пеш поян лие. Пайремым Морко районысо Шлань ял гыч «Эр кече», Озаҥ ола гыч Келшымаш пӧртын «Лай мардеж» да «Озаҥ мари» ансамбль-влак сӧрастарышт. Тыгак «Чордашлар» да «Гэуhэр» коллектив-влакын мурыштым калык рӱж совен вашлие.
«Шишорлан» ончыкыжат эшеат кугу сеҥымашыш шуаш тыланен кодына.
Пайремыш Марий Турек гыч Наталья Михайловна Ямниева толын. Тудо шке жапыштыже ансамбльым вуйлатен. Пайремыште йӧратыме шарнымаш мурыжым муралтен, шукыштын шинчавӱдыштым луктын. Но тиде куан шинчавӱд ыле. Тудланат, таум каласен, кугу сеҥымашым тыланена.
Тау участник, организатор-влаклан тыгай сай пайремым эртарымылан!
Любовь Михайлова.
Татарстан кундем.
