Илышна шке йыжыҥже дене эрта: кажне еҥ шке сомылжым шукта. Тыгодым ала-кӧн эргыже, пелашыже, уныкаже, иза-шольыжо элнан тыныслыкше верч тушман ваштареш геройла шога. Нунынат ешышт тӱрлӧ сомылым шуктат, а кузерак илат? Чоныштышт мо ышталтеш?
Тыгай шонымаш денак Медведево посёлкышто илыше шуко шочшан Альгинмытын ешыштышт уна лийым. Тушто ныл йоча кушкеш. Еш оза Владимир идалык ончыч СВО-ш каяш контрактым шке кумылын подписатлен, Ирина – икшыве-влак дене мӧҥгыштӧ: эн изиж дене декрет отпускышто шинча.
Ӱдыр ден каче 2010 ийыште палыме лийыныт. Ирина – Кужэҥер район ӱдыр, Владимир – Киров кундем гыч. Самырык мужырын йӧратымаш вигак ылыжын. Идалык гыч нуно мужыраҥыныт, а 2012 ийыште икымше йочашт шочын. Саша кызыт 5-ше классыште шинчымашым пога. Медведево посёлкысо «Витязь» ФОК пеленысе «Юный спецназовец» кружокышто кокымшо ий шуаралтеш. Нуно тӱрлӧ вере шкенышт дене палдарат. Районысо, республикысе конкурслаште вийыштым тергат. Кеҥежым рвезе группыж дене кундемнасе йоча лагерьыште сборышто лийын. Даша – ешыште кокымшо йоча. Тудо 2015 ийыште шочын, 2-шо классыште тунемеш. Ӱдыр сӱретлаш йӧрата, тыгак аэрогимнастике дене заниматла. Павлик – кумшо икшыве. Тудо Медведево посёлкысо 4-ше номеран школ пелен тазалыкым пеҥгыдемдаш полшышо группышто шуаралтеш. Йочасадыш коштеш. Эн изишт – Аня. Тудо але талукат пелаш веле. Анютан пел ияш улмыж годым ачашт СВО-ш каен. Тылеч вара элыштына мобилизацийым увертареныт. Мутат уке, тидыже Ириналан моткоч вучыдымо лийын. Идалык ончычсо жапым шарналтен, шуко шочшан ава тыгерак каласкалыш:
– Пелашем патриот шӱлышан. Тудо СВО-ш каяш шукертсек шонен коштын улмаш. Мутат уке, шонымашыже мыланем пешыже келшен огыл. Вет мемнан ныл йочана кушкеш, шкет ӱдырамашлан изи йоча-влак дене куштылгыжак огыл. Икте дене урокым ыштыман, кокымшым кружокыш ужатыман, йочасадышкат наҥгайыман. Эшежым кызыт икшыве-влак чӱчкыдын черланат. Садлан нуным воспитатлаш полшымаште ачанан полышыжо огешак сите. Кевытыш але иктажше дене поликлиникыш миен толман гын, кугуракше-влак шинчат. Коклан акам ден изам толыт. Нунын полшымыштлан кӧра мыланем куштылгырак. Ачам ден авам деке шочмо ялыш кудалыштына. Кеҥежым шуко жапым тушто эртаренна.
Владимир мобилизоватлыше-влак деке огыл, а шке кумылын кайыше-шамыч деке логалын. Ик жап Тольятти олаште ученийым эртен. Садлан бой кайыме верышке моло деч ончычрак миен шуын. Икымше отпускыш мартыште толын, кокымшылан августышто мӧҥгыштӧ лийын. Пӧръеҥ шуэн йыҥгырта гынат, кажне йыҥгырже моткоч вучымо. Эн ончыч икшыве-влак нерген йодыштеш. Отпускыш толмыж годым шуко жапым нунын дене эртараш тыршен. Тӱрлӧ вере коштыныт, пӱртӱсыштӧ пырля каненыт.
«Кугыжаныш могырым ешлан могай полыш пуалтеш?» йодышемлан, Ирина тыгерак мане:
– Йоча-влаклан школысо ешартыш занятийлашке яра кошташ лиеш. Тыгак кочмылан оксам тӱлыман огыл. Анютам талукат пелашым йочасадыш налыныт. Телым лагерьыш колташ темлымаш дене Соцзащите гыч йыҥгыртеныт ыле, но тунам йӧндымӧ лийын. Тылеч вара иктаж полышым пуымо шотышто мемнан деке иктат толын огыл.
Ирина дене тӱрлӧ нерген мутланышна. Самырык ӱдырамашын чоныштыжо, чынжымак, мо ышталтеш каласаш неле. Шинча лукыштыжо – шинчавӱд, логарыште – комыля. Ирина пелашыжын тазалыкше верч тургыжлана. Идалыкыште ныл гана контузитлалтын, капыштыже изирак осколко-влак улыт. Владимир реабилитацийым эрташ кажне гана тореш лийын. Ончыкыжым тидыже тазалыкшылан кугу эҥгекым ыштен кертмылан кокытелана. Тудо пелашыж дене СВО нергенат утыжым ок мутлане. Лучо икшыве-шамыч нерген кутырена манеш. Самырык авалан кызыт куштылгыжак огыл. Тудын палемдымыж почеш, эн нелыже икшыве-влакым воспитатлымаште. Вет кажне йоча тичмаш ешыште кушшаш, ача-аван йӧратымыштым, чон шокшыштым шижшаш. Пачерыштат пӧръеҥын кидше огеш сите. Иктаж-мо шалана гын, тудым ачалыман, тӧрлатыман. Тыгай годым Ирина адакат шӱжарже да тудын пелашыжлан эҥерта.
Ӱшанена, Владимир ден Ириналан куштылго огыл жапым илен да чытен лекташ икшывышт-влак полшат! Тек тыге лиеш, а ме геройым вучаш тӱҥалына!
Еш альбом гыч налме фото.