Шинчалан койдымо пошкудо-влак

Ача-авам ялыште шочын-кушкыныт. Самырыкышт годым олаш илаш кусненыт гынат, чонышт эре ялыш шупшын. Икмыняр ий пачерыште илымеке, нуно ола деч тораште огыл ик ялыште тошто пӧртан мландым налыныт.

Ты пӧрт покшелне изирак коҥга лийын, но тудо уло пӧртым ырыктен ситарен огыл. Садлан ача-авам тушко кеҥеж жаплан гына даче семын кудалыштыныт. Икымше кечынак ты коҥга шеҥгеч йӱк-влак шокташ тӱҥалыныт. Ачам ден авам урем гыч пошкудо-влакын йӱкышт пӧртыш шумеш шокта манын шоненыт. Вес кечын йӱкым адак колыныт. Уремыш лектын ончалыныт, но иктат лийын огыл. Уэш пӧртыш пурымекышт, адак пуйто ала-кӧ кутырен. Мутланыме йӱк кӱвар йымач шоктен. Пуйто ӱдырамаш ден пӧръеҥ тыматлын кутыреныт. Тылеч вара ача-авам йӱкым кажне кечын гаяк колыныт.

Ачам ден авам мистикылан ӱшаненыт. Ачам вес тӱня нерген лудаш йӧратен, тиде темылан тудо шагат дене кутырен кертын. Садлан коҥга шеҥгеч шоктышо йӱклан ачамат, авамат пешыже ӧрын але лӱдын огытыл. Шинчалан койдымо пошкудо-влак дек тунемын шуыныт. Тылеч ончыч пӧртыштӧ илыше-влакын чонышт тыштак ила манын шоненыт. Икмыняр жап гыч, йӱк-влак ала когылянышт гына шокта манын, пошкудо ӱдырамашым ӱжын конденыт. Тудат коҥга шенгелне мутланыме йӱкым колын.

Ачам ден авам иктаж кок тылзе палыдыме-влакын кутырымыштым колыштын иленыт. А вара коҥга шеҥгелнысе йӱк шыпланен. «Кӧн йӱкшӧ шоктен? Ончыч тыште кӧ илен? Ала тыште иктаж-кӧн ӱмыржӧ лугыч лийын?» – йодыштынам авам деч. Но тудо нимом пален огыл, пӧртым увертарымаш гоч муын налыныт.

Ала чынжымак ончыч тыште илыше мужыр йӱк-йӱаным ыштен. Ача-авам нунын деч лӱдын огытыл. Шкеныштым лӱдыктат гын, ала йӱк-влак кызытат шоктат ыле?

Екатерина.

Йошкар-Ола.

Интернет гыч налме фото.