Шинчалан койдымо чӱчӱ

Ик кастене паша деч вара кӱлеш сомылым ыштен пытарышым да диваныш каналташ шинчым, телевизорым чӱктышым. Воктекем пырысна толын возо. Пелашем вес кечылан паша ӱзгаржым ямдыла. Эргына (кум ияш) шукерте огыл налын пуымо модыш машинаж йыр пӧрдеш.

Икмыняр жап гыч пелашем мый декем ӧрткен куржын тольо, чурийже ошо, шинчажым пашкартен. Кидше дене кухньо могырыш ончыкта да ала-мом ойлынеже. «Тушто… ончал», — манеш. Эргына иктаж-мо лийын манын, вашке гына кухньыш куржын мийышым. Икшывына ӱстел йымалне шыпак шинча да ала-мом ниялткала. А тиде ала-можо ок кой, тудо пуйто южым тӱкала. Пелашем дене ӧрдыжтӧ шыпак ончен шогена. Вара эргына изи машинажым ала-кӧлан пуйто ончыкта. Тиде ала-мо манмыже изиракла чучеш — йочана, чӱчырнен шинчын, тудын ӱмбак онча.

Эргым, кӧ дене модат, кӧм ниялткалет? — пелашем чытен ыш керт, йодо.

Чӱчӱ, тушто чӱчӱ… — умылтараш тырша ньогана.

Тудын деч от лӱд? — мыят йодым.

Уке, тудо поро да изи, — манеш эргына.

Вара ӱстел йымач лекте, тудо могырыш ончале да, чеверласыме семын кидшым рӱзалтен, залыш модаш куржын колтыш.

Йоча-влак кугыеҥлан койдымо сӱретым ужын кертыт манмым ончычат колынам ыле. Икшывынан шинчажлан кӧ койын, ӧрмашан веле. Ала суртводыж шинчажлан пернен?

Елена.

Звенигово.