Федеральный льготник-влак ондак социальный услуго набор (НСУ) олмеш оксам налыныт гын, 1 октябрь марте Соцфондыш уэш услугым налаш йодын возен кертыт.
Кугыжаныш НСУ-м але тудлан кайыше роскотым пӧртылташ оксам ойыраш йӧным пуа. Но тиддене шонен пайдаланыман, тазалыклан могай полыш кӱлын кертме шотышто ончылгоч сайын шоналтыман.
Марий Элын тазалык аралтыш министржын алмаштышыже Юлиана Зейтулаева ойла:
– Тазалык кызытеш огеш тургыжландаре гын, айдеме НСУ олмеш оксам налаш кумылаҥеш. Но тазалык кенета лунчырген кертеш, тунам эмлалташ шуко эмым налаш перна, шке окса ок сите лийын сеҥа. Южгунам ик ате эмак икмыняр тӱжем теҥгем шога. Поснак онкологий, вергын ситыдымашыже чер, бронхиальный астме, ревматоидный артрит, сакыр диабет дене орланыше-влаклан.
Айдемылан, соцуслуго деч шӧрлымеке, эмлан тылзеш 1331 теҥгеат 30 ырым веле пуат, тудо врачын темлыме препаратым налаш ок сите. Ятыр чер годым айдемылан ӱмыржӧ мучко эмым йӱман.
1 октябрь марте НСУ-м уэш налаш тӱҥалме шотышто йодмашым возен шуктыман. Чыла тугак кодынеда гын, возыман огыл. Йодмашыште кеч НСУ-м, кеч оксам налаш ойыренда – тудо 2026 ий 1 январь гыч пуалташ тӱҥалеш.
19 тӱжем еҥ Марий Элыште НСУ-м налеш. Чылаже регионыштына 73 тӱжем утла федеральный льготник ила. Ты тӱшкаш инвалидностян еҥ, Кугу Отечественный сарын участникше, боевой действий-влакын ветеранышт да молат пурат.
Социальный услуго наборын акше кажне ийын индексироватлалтеш, палдара Россий Социальный фондын Марий Элысе пӧлкаже. 2025 ийыште тудо тылзеш 1 728 теҥгеат 46 ырыш шуын. Тушко пурат:
- врачын рецептше почеш эмым налаш – 1 331 теҥгеат 30 ыр;
- санаторийыште эмлалташ путёвкылан – 205 теҥгеат 95 ыр;
- эмлалтме верыш да мӧҥгеш ола воктенысе кӱртньыгорно транспорт, тыгак ола кокласе транспорт дене яра кудалышташ – 191 теҥгеат 21 ыр.