Марий Эл Республик вуйлатышын сомылжым жаплан шуктышо Юрий Зайцев «Марий кеҥеж» фестивальым эртараш палемден. Тыге кажне каныш кечын олаште палемдыме верлаште да районласе площадьыште тӱрлӧ мероприятий лиеш.
Теве, мутлан, 21 августышто Брюгге Набережныйыште «Ший полан»(Йошкар-Ола) ансамбль калыкым куандарен.
Пайрем кас кузе эртыме нерген ансамбльым вуйлатыше Людмила Купсольцева каласкалыш:
— 16 шагатлан выступленийна тӱҥалшаш ыле. Мемнан мийымылан, калык погынен ыле. Палыме, палыдымыже, изиже, кугужо — чылан рӱж мурен-куштышна. Кугурак ийготанже совым перен шинчен, но чонжо дене садак тавалтен колтен. Кӧ куштен моштен огыл- туныктенна.
Гармонистна Валерий Черепанов кок шагат эре шоктен. Тудлан кугу тау!
Кертмына-моштымына семын калыкым куандарашак тыршышна.
Вес ганат тыгай мероприятийыш ӱжыт гын, уло кумылын погынен каена.