
25-27 ноябрьыште Йошкар-Олаште регион-влак кокласе «Ший памаш» финн-угор эстраде муро фестиваль-конкурс шымше гана лиеш.
Тушто финн-угор тӱня гыч 16-35 ияш, тыгак 36-55 ияш мурызо да 5 еҥ марте мурышо ансамбль-влак мастарлыкыштым ончыктат. Участник-влак Пошкырт, Удмуртий, Марий Эл гыч улыт.
Конкурсыш ушнышо участник-влак тӱрлӧ сынан 3 мурым ямдылат: калык мурым, шлягерым (калыкыште кумдан палыме да йӧратыме муро) да пытартыш кум ий жапыште возымо у мурым. Конкурс условий почеш кум мурыге фонограмме почеш мурыман. Тыгак «У муро» номинацийыште мурылан семым да мутым келыштарыше самодеятельный автор-шамыч коклаште конкурсым увертарыме.
Икымше мурым (шлягерым) конкурсант-влак 25 ноябрьыште Медведево тӱвыра полатыште мурат. Вара фестиваль-конкурс Йошкар-Оласе В.И.Ленин лӱмеш тӱвыра полатышке кусна. 26 ноябрьыште участник-влак калык муро ден у мурым мурат. «Ший памаш» ты полатыштак 27 ноябрьыште кугу гала-концерт дене мучашлалтеш.