Ший окса
Шым ий ончыч 18 ияш акам пикталт колен. Ешышкына толшо ойгым мут денат каласаш ок лий. Ала мый тидым чактарен кертам ыле манме шонымаш тылеч вара вуйыштем чӱчкыдын пӧрдын. Акамын тыге ыштымыжлан шемым южгунам титакленам. Тудын уке лиймыж деч вара нигӧлан кӱлдымӧ гай чучынам. «Ала мыланемат акам семынак илышым пытараш? – жапын-жапын шоненам.
Айдеме шке лушкыдо койышыжым ончыкта гын, осал вий – туштак, маныт. Чынак улмаш. Икана пелашем дене (тунам эше марлан каен омыл ыле) йолташна деке унала малымыла миенна. Кастене шинчылтмеке, малашат жап шуо. Тунам пелашем дене сайынак туманлышна, сырымем дене пӧрт гыч лектын кайышым. «Пикталташ кӱлеш» – вуйыштем пӧрдеш. Кудывечыш лектым, оҥ гыч ыресем кудашым. А вара шонем: «Тыге ыштем гын, йолташ ӱдыремлан эҥгекым ыштем. Вет тудын пелашыже вахте дене пашаш кудалыштеш, йолташем шкет шогаш лӱдаш тӱҥалеш». Пӧртыш пурышым да малаш возым.
Омым ужам. Кӱ гыч ыштыме моткоч кугу площадьыште улам. Ты кумдыкышто кум метр наре келгытан вынем-влак улыт, кажне тыгай вынем покшелне меҥгым шогалтыме. Площадь покшелне, кӱкшакарак верыште шем ӱпан ӱдырамаш шога. Кемым, кужу плащым чиен, кидыштыже – вичкыж воштыр. Тӱрвыжӧ чевер йошкар тӱсан, шинчаончалтышыже шыде.
Ик вынем дек лишемым, ончем: акам меҥге йыр чарныде коштеш. Саде плащан ӱдырамашлан жапын-жапын тыгыде оксам шуя. Акам деч тӱрлӧ нерген йодыштам, но тудо нимом ок вашеште, южгунам лач вуйжым гына рӱза. А шинчаштыже тынар ойго! Оксатше кушеч манын йодмекем, шыде ӱдырамаш шучко йӱкым лукто, воштыржым кӱш нӧлтале да свиданийлан ойырымо жап пытен манын ойлыш.
Авамын кажне кечын акам верч лудмо молитваже саде ший окса. Тунам тыге шоналтышым, акам дечат тидын нерген йодым. Тудыжо, «Туге» маншыла, вуйжым кумык ыштыш. Эше кунар тылат тыге кошташ манын йодмемлан акам «Эре» манын вашештыш. А саде площадьысе кажне вынемыште меҥге йыр еҥ-влак тыге коштыныт, нунылан чарнен шогалаш ок лий – ӱдырамаш вичкыж воштыр дене логалта.
Помыжалтым, пуйто ала-кӧ кидем гыч шупшеш. «Пикталташ кӱлеш» – адак вуйыштем пӧрдеш. Кынельым, ыресем чийышым. Уке, шонем, илыманак. Вет акам мыйым утараш ший оксам пуэн.
Екатерина.
Оршанке район.
Фотом https://www.freepik.com/ сайт гыч налме.