«Ший ден шöртньö», але «Ший полан»

Кызыт Интернетыште могай гына тÿрлö видеом, мурым, увер-влакым от уж. Но ик видом ужмеке, мучаш марте ончаш кумыл лекте. Умбакыже тиде ансамбль нерген кумданрак пален налмем шуо, сандене соцсетьыште серышым возен, икмыняр кече гыч ансамбльын вуйлатышыже-влак дене вашлийна.

АНСАМБЛЬ

Вуйлатыше-влак Андрей Купсольцев ден Людмила Короткова «Весела сем» ансамбльыште палыме лийыныт, келшаш тӱҥалыныт. Кок ий наре тиде ансамбльыште выступатленыт. Но чонышт ала-мом весым йодын. Тунам коктынат ансамбль гыч каеныт. Кайымеке, еш ансамбльым ышташ шоненыт. Тыгак нунын деке йолташышт Зоя Танерова эргыж дене ушнен.

Икымше гана «Играй, гармонь майская» мероприятийыш миеныт. Тунам ансамбльын лÿмжат лийын огыл. З.Танерова ден Л.Короткова коктынат ший аршаш дене шогеныт. Иктын — шöртньö, весын — ший. Тунам ик ÿдырамаш лишемын да «Вы как серебро с золотом» манын ойлен. Тыге «Ший ден шöртньö» лӱман еш ансамбль сценыш лектын. Вуйлатышылан гармоньчо Андрей Купсольцевым шогалтеныт.

2019 ийыште Кужэҥер гыч Ольга Сергеева «Муро памаш» фестивальыш нуным ÿжын. Тушеч грамот да пöлек-влак дене пöртылыныт.
https://www.youtube.com/watch?time_continue=1&v=a0fEAd_QBvA&feature=emb_logo

 «Тӱрлӧ вере коштмеке, еҥ-влак мемнан деке ушнаш кумылаҥыныт. Репетицийым эртараш верна лийын огыл. Верым муына гын, ансамбльым погена манын кутырен келшенна. Йошкар-Олаште самырык-влакын полатышкышт О.Г.Семенова деке йодын миенна. Тудо ансамбльнан лÿмжым вашталташ темлыш. Пырля шонкален, «Ший полан» ансамбль шочо.

2019 ий октябрьыште ансамбльым чумырышна. Палыме ÿдыр-рвезе-влак толаш тӱҥальыч. Репетиций арнялан кок гана эртаралтеш. Иктаж мероприятий деч ончыч кум-ныл ганат погынен кертына. Коллективыште – 10 еҥ. Участник-влакын кок тӱрлӧ костюмышт уло. Ургызо Зоя Танерова дене шканна районлаште чийыме комплектым ямдыленна. Моло ÿдыр-влакланат ышташ шонена. Провой ден Курыкмарий районлаште чийыме марий вургемна веле уке», – ойлыш Людмила Короткова.

Нуно ятыр фестивальыш коштыт. Мутлан, январьыште Киров кундемыш, Яранскыш, «Марий сем» марий фольклор фестивальыш миеныт. Марий вургемым, тӱрым ончыктеныт. Тусо калык нуным пеш кÿкшын аклен.

ИНТЕРНЕТЫСЕ ВИДЕО

«Ший полан» ансамбльым «Муро памаш – 2020» фестивальыш ÿжыныт да видеом войзен колташ йодыныт. Лач карантин жап лийын, Самырык-влакын полатыштышт погынаш огеш лий. Мом ышташ? Ӱдыр-влак дене кутырен келшен, паша деч вара Зоя Танерован садыштыже погыненыт. Видеом войзаш палыме ÿдырым йодыныт.

«Муро тыге тÿҥалеш: «Кеч пашаште, кеч модмаште…», сандене видеона тыгаяк тӱҥалтышан, пуйто чылан пашам ыштена, а вара мураш шогалына. Эше вес кок номерым ыштышна. Умбакыжат тыгай видео-влакым войзаш шонымаш уло. Нуным фестивальлаштат визитный картычке семын ончыкташ йöнан»,– палдарыш Андрей Васильевич.

https://vk.com/video?z=video353756413_456239033%2Fpl_cat_updates

 

ПАЙРЕМ

А.Купсольцев ден В.Смоленцев йолташыже пайремлашке пырля коштыт. Кеч сÿаным, кеч вес пайремым сöрастарат. Виталий Иванович баян дене шокта, а Андрей Васильевич – гармонь дене. Андрейын пелашыже Людмила – тамада. Икана нунын деч конкурс-влакым эртараш йодыныт. Шуко шоныде, ситуаций гыч лекташ йöным муыныт.

«Пашаште ÿдыр-влакын шочмо кечыштым эртаренам. Тыгак сÿанышкат коштына. Икана родо-влаклан сÿаным эртаренна. Пелашем гармоньым шоктен, а мый вÿденам. Оксам налын огынал, но мыланна илыше комбо ден лудым мешакыш чыкен колтеныт», – ойла тамада.

«ШИЙ ПОЛАНЫН» «АЧА-АВАЖЕ»

Людмила Короткова Кужэҥер район Шÿдымарий ялыште шочын-кушкын. Йÿледÿр школышто тунемын. Школыштак ансамбльыш коштын. Ачаже гармонист лийын, аваже мураш йöратен, сандене ӱдыр мурылан шӱмаҥ кушкын.

Йоча ансамбль олаште ятыр гана выступатлен. Училищыште да колледжыште тунеммыж годым, йоча-влакын изиракышт годым Людмилан мураш-кушташ жапше лийын огыл. Молыж годым эре ансамбльыш коштын.

2015-2019 ийлаште «Весела сем» ансамбльын участникше лийын. 1996 ий годсек Йошкар-Олаште кожно-венерический диспансерыште медицине-лабораторный техниклан ышта.

Андрей Купсольцев Йошкар-Олаште шочын-кушкын. Шернур районынат, Медведево районынат шочшыжо улам манеш. Ачаже Шернур район Купсола ял гыч, а аваже – Медведево район ÿдыр. Изи годсек гармонист воктене шинчаш йöратен. Аваже изи гармоньым налын пуэн, а Андрей гармонистын шоктымыжым ончен тунемын.

«Знаменский» совхозысо клубыштат, Шойбулакыштат гармонистлан пашам ыштенам. Тушто Зоя Танерова мыйым ужын. Вара «Весела сем» ансамбльыш ÿжын. Концертыште – 30 номер, чыла районын семжым шоктен моштыман. Тунам мый телефоныш чыла районысо семым возен толынам да Виталий Иванович Смоленцев деч полшаш йодынам. Тыге тунемынам», – ойлыш Андрей Купсольцев.

Тудо 1996-2018 ийлаште кермыч заводышто тыршен, а кызыт «Шойбулакский» совхозышто трактористлан пашам ышта.

 

Муро тÿняште шочынкушшо еҥ-влак тидын деч посна илен огыт керт. Лач тыгаяк улыт Людмила ден Андрей. Нуно икте-весыштым вашлийын, у «саскам» шочыктеныт. Тек пашашт умбакыжат тÿвыргö лектышан лиеш.