Тиде 1980-ше ийлаште лийын. Ешна дене ола тӱрысӧ вич пачашан ик пӧртыштӧ иленна. Пошкудо йоча-шамыч дене уремыште эре пырля модынна. Икана мемнан деке палыдыме ӱдыр ушнен. Лӱмжӧ – Анжела. Тудо кугу мотор шинчан. Мыланем вигак келшен. Варажым Анжела мыйын эн сай йолташ ӱдырыш савырнен.
Анжелан парняштыже кугу ужар кӱан шергаш лийын. Ӱдырлан тудым кокаже пӧлеклен, манын. Кокажын йӧратыме еҥже шергашым шкеак ыштен да тудлан пӧлеклен улмаш, но ӱдыр ден каче варажым ойырленыт. Садлан кока тукым шӱжаржылан шергашым пуэн.
Мыйынат йолташ ӱдырем гай шергашым чийымем шуын. Мӧҥгыштӧ авамын ошалге-кына кӱан ший шергашыже киен. Садлан тудым йодын налынам да чияш тӱҥалынам. Мотор сӧрастарышемым йолташ ӱдыремлан куанен ончыктенам. Тудланат шергашем келшен.
Варажым Анжела дене шергашна дене вашталталтынна. Ик жап гыч тудо шке шергашыжым пӧртылташ йодын. Тидланже сыренамат ыле, вет Анжела шке вашталташ темлен, а вара торешланаш тӱҥалын. Тидлан кӧра туманленна. Мый шке шергашем налынам, тудыным йол йымакыже кудалтенам.
Икмыняр жап гыч Анжелан неле чер дене орланымыжым пален налынам. Тыгай чер дене шуко огыт иле. Йӱд мучко тудым чаманен шортынам. Эрлашыжым сӧрасаш каенам. Тетла Анжела дене ик ганат сырен огынал. Но черле улмыжо нерген нигӧланат ик мутымат луктын омыл. Тылеч вара кок ий эртен. Анжела мыланем тазалыкше шотышто нигунам вуйым шийын огыл. Садлан тӧрланен манын шоненам.
Но йоҥылыш лийынам. Ик мотор кастене йолташ ӱдыремым вуйушым йомдарышым эмлымверыш наҥгаеныт. Тушто тудо илыш дене чеверласен. Ты случай мыйым икымше гана колымаш дене ваш ыштен. Тунам мыланем чот йӧсӧ лийын. Вет Анжела дене пырля модын куржталынна, жапым эртаренна. А ынде тудо уке…
Кок тылзе гыч парнясе ший шергашем йомдаренам. Уло пӧртым савыренам, манаш лиеш, но муын омыл. А икмыняр кече гыч школ гыч пӧртылмем годым пӧрт воктенысе теҥгылыш каналташ шинчынам. Такшым эре вигак мӧҥгӧ пурем ыле. Кенета йол йымалнем Анжелан ужар кӱан шергашыжым верештынам. Куанымем дене мӧҥгӧ куржын пуренам. Тушто мыйым авам вашлийын да Анжелан нылле кечышкыже каена манын. Йолташ ӱдыремын шергашыжым парняшкем чиенам да тудын воктене улмыжым шижынам. Анжела мыйын ший шергашем налын, шкенжыным мыланем пуэн, манын шоналтенам. Вет икмыняр ий ончыч ме вашталтенна да варажым сыренна ыле…
Кызыт мый пел курым наре ийым эрталтыше ӱдырамаш улам. Но йолташ ӱдыремын шергашыжым тачат аралем. Южгунам чот неле годым тудым луктам да вийым йодам. Ӱшанеда але уке, но вий-куатым шижам.
ТАМАРА.
Виче кундем.