Марий Элыште кажне ийын эндокринный системыште патологий вияҥме нерген нылыт гыч куд тӱжем марте случайым пален налыт. Нунын коклаште ик эн чӱчкыдын вашлиялтше (31 процент наре) – сакыр диабет.
Республикыште илыше кугыеҥ-влак кокла гыч 5,2 процент еҥ ты чер дене орлана. Тиде шуко, вет сакыр диабет инвалидность да колымаш марте шукта. Тидлан амалым вӱргорнышто лийше нелылык-влак ыштат, вет тыгай годым шинча чер-влак вияҥыт, верге ден шӱм «орланат». Адакшым окса могырымат нелылык лектеш – пациент-влакым эмлаш шагал огыл шийвундым ойырыман.
Марий Элыште сакыр диабет дене диспансерный учётышто 25 тӱжем наре еҥ шога, нунын кокла гыч – 17 ий марте йоча-шамычат. Кугыеҥ-влакым утларакшым кокымшо типан диабет «витара».
Диабетан пациент-влак кокла гыч 1700 еҥже ретинопатий (шинча сетчатке пыта) чер дене орланат, 200 наре еҥын вергыже пыта, 30 наре пациент гемодиализыш (вергын функцийжым лӱмын аппарат шукта) коштеш. Кажне ийын 30 наре еҥын йолжым пӱчкыт.
Марий Эл Республикысе Правительствын пунчалже почеш «Борьба с сахарным диабетом» регионысо проект илышыш пурталтеш. Тудын тӱҥ задачыже – ты черым тӱҥалтыш стадийыште пален налаш да эмлаш.
Фотом https://www.freepik.com/ сайт гыч налме.