Шемшыдаҥ ложаш пеш пайдале. Тудо организм гыч радионуклидым луктеш, вещества-влак алмашталтмым саемда, чогашылыште вийым ешара, вӱргорным, нерве системым пеҥгыдемда, пагар-шоло корным тазаҥда.
Шекшым лукташ манын, ик стакан кефирыш ик кугу совла ложашым пыштыза да йӱдвоштлан кодыза. Эрдене эр кочкыш олмеш кочса.
Сакыр диабет дене орланеда гын, эр кочкыш олмеш да кас кочкыш деч пел шагат ончыч ик стакан кефирым ик кугу совла ложаш дене луген кочкаш пайдале. Тыге кум тылзе деч шагал огыл жап ыштыман.
Атеросклероз годым кечылан кок гана, эрдене да кастене, 100-150 грамм дене шемшыдаҥ кисельым йӱаш пайдале. Тидлан ик стакан йӱштӧ вӱдыштӧ кум кугу совла шемшыдаҥ ложашым лугыман. Вара ик литр вӱдым посна шолтыман да ямдылыме вартышыш опталман. Кисельым, эре луген, 8-10 минут шолтыман. Тамлырак лийже манын, тушко мӱйым да пӱкшым ешараш лиеш.
Анемий годым салмаш когартыме ложашым кок кугу совла дене кечеш ныл-вич гана шокшо шӧр дене подыл кочса.
Щитовидный ту чер годым ик стакан шемшыдаҥ ложашым, 1 стакан тыгыдемдыме грецкий пӱкшым, ик стакан шемшыдаҥ мӱйым иктеш сайын варыза да янда банкыш оптен шындыза. Тудым холодильникыште аралыза. Арняште ик кечын ты вартышым гына кочман. Тыгак чай ден вӱдым кеч-мыняр йӱаш лиеш.