Шокшо кече толмо дене ятырын пӱртӱс лоҥгашке каналташ лектыт. Тыгодым аяран кишке деч шекланыман. Марий Элыште тыгайже шемгишке гына уло.
Пӱртӱсыш каяш тарванымеке…
кужу шулышан кемым да пеҥгыде куэман вургемым чийыман;
купан, вӱдкашкан, мӧдывуян, кӱкшӧ шудан, тыгыде вондеран верлаш, эҥыж да шемэҥыж вондер коклаш пураш ида тырше, тыгай верлам шемгишке поснак йӧрата;
кишкым ужмеке, ида тарваныл, тӱҥын шогалза, тек кишке нушкын кая;
куржман огыл. Тыге воктене улшо вес кишкым тошкалын кертыда.
Кишке чӱҥгалын гын…
Тарванылман огыл. Кажне тарванылме еда аяр капкыл мучко чотрак шарла.
Кишке чӱҥгалме вер деч кӱшнырак пеҥгыде повязкым кылдыза. Но шекланыза: тудо вӱрлан кошташ ынже чаре, пуалаш тӱҥалмеке луштарыман.
Яндар вӱдым шукырак йӱман, тыге вӱрыштӧ аярын концентрацийже иземеш.
Чӱҥгалме верыш стерильный повязкым пыштыман.
Кишке чӱҥгалмеке, спиртан нимогай йӱышым, чайым, кофем йӱман огыл, нуно аярым кап мучко писынрак веле шараш полшат. Чӱҥгалме верым ны пӱчкаш, ны когарташ ок лий, инфекций пурен кертеш.
Эмганыше еҥым стационарыш вашкерак намиен шуктыман, тунам илышыжым утарен кодаш йӧн шукырак. Эмлымверыште тудлан противозмеиный сывороткым ыштат.