Уремыште – октябрь. Катя 18 ияш, студентке. Ӱдыр оласе Денис рвезе дене келшен. Качын шке пачерже лийын. Икмыняр жап гыч рвезе Катялан пырля илаш темлен. Ӱдыр келшен. Тыге Катя ден Денис пырля илаш тӱҥалыныт.
Денисын пошкудыжо Лена лӱман ӱдырамаш – сулен налме канышыште. Ончалмаште тыглай илалше ӱдырамаш, тӱрлӧ магий дене заниматла манын от шоналте. Пытартыш кум ийым эмлымверыште эртарен. Психике могырым тазалыкше начар улмаш. Ты ӱдырамашлан у пошкудо (Катя) келшен огыл. Ик жап Денис деч пачержымат ужалаш йодын. Пуйто тушко шке аважым илаш кондынеже улмаш. Но рвезе ужалаш тореш лийын. Тидланже ӱдырамаш эшеат чот сырен. Самырык-влак ваштареш тӱрлӧ кӱлеш-оккӱл пашам шукташ тӱҥалын.
Ик кечын малыме годым тӱрлӧ йӱк-йӱан шоктен: янлык-влак урмыжыныт, кӱмыж-совла мӱгырен, йолым, кидым пуйто ала-кӧ чывыштылын. Эрлашыжым Катя мӧҥгӧ гыч лектынат огыл, пачерыштак жапым эртарен. Денис паша гыч толмыж годым омса воктене кийыше йол шартыш ӱмбалне ятыр кечшудо шӱкым верештын. Нимом шоналтыде налын да почкалтен. Тыгодым омса лондемыш кералын кодымо имым ужын шуктен. Тылеч вара ӱдыр ден каче пырыс ден пийла иленыт. Эре вурседылыныт, кӱлеш-оккӱллан ӱчашеныт. Рвезе чӱчкыдын мӧҥгӧ гыч лектын каен.
Ик кечын Катя ден Денис пошкудо ӱдырамашым вашлийыныт. Тудо нунылан «Мый тендан деке шем шинча дене ончем» манын тура ойлен. Тылеч вара ӱдыр ден каче коктынат эмлымверыш логалыныт. Идалык эртымеке, Катя ӱдыр йочам ыштен, но Денис дене тыгак вурседылын, ӱчашен иленыт. Йоча кандаш тылзым темымеке, самырык пӧръеҥ вӱдыш пурен колен. Тудын капшым муын огытыл.
Денис деч ончыч аваже илыш дене чеверласен. Тудын 40 кечыжлан Денис вӱдыш пурен каен. Икмыняр тылзе гыч коваже, вара ачаже да кок изаже коленыт. Пуйто рвезын ешыжым, чынжымак, каргеныт.
Катя аза дене ты пачер гыч каен, а пошкудо Лена ӱдырамаш тугак тушто ила. Кӧ пала, ала чынжымак тудын шем шинча дене ончымыжо ешым пытарен?