Йошкар-Олаште «Шекланен, орнитоз!» проект мучашлалтеш. Тудым РФ Президент грант-влак фондын полшымыж дене «Шанче да социальный инициативе рӱдер» автономный коммерческий огыл организаций илышыш шыҥдарен.
Тыгодым Марий кугыжаныш университетын биологшо-влак шымлымашым эртареныт да палемденыт: Йошкар-Олан рӱдӧ да эҥер вес могырысо ужашлаштыже ик квадрат километр кумдыклан 950 наре кандалге кӧгӧрчен шотлалтеш. Тыгай кайыкын шукеммыжын амалже: кайыклан игым пӱкташ сай вер-влак улыт, янлык-влак нуным огыт тӱкале, еҥ-влакат оласе кӧгӧрчен-шамычым талук мучко пукшат.
Фондын оксаж кӱшеш Йошкар-Оласе бульварлаште кӧгӧрченым пукшымаш оласе средалан, айдемын тазалыкшылан да кайык-шамычлан эҥгекым конден кертме нерген вич информационный стендым руш да марий йылмыла дене вераҥдыме.
Пале: кандалге кӧгӧрчен-влак 90 наре тӱрлӧ черым шаркалат, нунын коклаште айдеме дек куснен кертше-влакат улыт. Иктыже – орнитоз. Айдеме кӧгӧрченым кучымыжо але кайыкын терысше, тазылаже, пунжо пӧрдалме верыште шӱлен коштмыж годым черланен кертеш. Кӧгӧрчен-влак шкештат «ӱстембач» пукшымо кочкыш деч черланат да кочкышым кычал моштымым чарнат. Кайык-влакын терысышт пӧрт-влакын фасадыштым да архитектур памятникым локтылеш. Кодшо кочкышлан кӧра тыгаяк инфекциян черым нумалше куголя-влак пошен кертыт.
Мемнан пагалыме гражданна-влак кандалге кӧгӧрчен-влак дене шкеныштым шекланен кучаш тӱҥалыт манын ӱшанена!
Проектым вуйлатыше, биологий шанче кандидат, биологий кафедрын доцентше Н.В.Турмухаметова.