Шеҥше селаште Рошто лудмаш эртен

Морко районысо Шеҥше кыдалаш школышто декабрьын икымше кечынже Рошто лудмаш шанче туныктыш конференцийын секционный заседанийже эртыш.
Тушто тачысе илыш саманыште могай корным ойырымо, пӱрымашнам шотыш налын, тудым виктарен моштымым, поснак самырык тукымлан тидым умылтарен, ончыкылык йӧн дене вияҥмаште чын корным кычалме шотышто мутланыме.
Погынышо-влакым Шеҥше школ вуйлатыше Л.Л.Артемьева, верысе ял шотан илем вуйлатыше П.С.Иванова саламлен ойленыт. Шеҥше селасе Казанский Юмын Ава лӱмеш черкын настоятельже Евгений ача шуко поро мут дене сугыньлыш.
Морко районысо Арын селасе Христос Шочмо лӱмеш черкын настоятельже Николай ача «Тынеш пурымо таинстве: чынже кузе лийшаш да мо ышталтеш» теме дене шке приходыштыжо улшо пример-влак гоч каласкалыш. Туныктышо-влакат шке докладыштышт ятыр пӱсӧ йодыш-влакым тарватышт, паша опытышт дене палдарышт. Тӱҥ мутланымаште пӱтынь тӱня ден эрык кыл улмо годым, кузе айдемылан шке тӱсшым арален кодаш манме йодыш рашемдалте. Доктор Боровскихын «Российыште мобилизаций» видеороликым ончымеке, иктешлымашым Моркысо Юмын Кончымо лӱмеш черкын настоятельже Леонтий ача ыштыш.
Толшо уна-влаклан туныктышо коллектив марла муро-влакым муралтышт.
Тыгак мутланыме теме дене кылдалтше книга выставкым чумырымо ыле.
Лариса КСЕНОФОНТОВА.