Ий гыч ийыш профсоюз толкын шке пашажым виянрак да виянрак шуктен толеш. Теве Морко кундемыште туныктымо аланысе профсоюз ушем тунемме идалык тӱҥалтыш гычак моткоч шуко мероприятийым эртарен шога. Тудын паша кышкарыштыже чыла школласе пашаеҥ-влаклан тӱрлӧ сынан профсоюз таҥасымаш-влак лиедат. 6 апрельыште Морко посёлкышто шашке дене черетан ӱчашымаш лийын. Таҥасымаш «Тазалык арня» жапыште эртен да 24 участникым авалтен шуктен. 12 школ гыч эн чолга шашист-влак толыныт да усталыкыштым тергеныт.
Морко кундемысе школлаште тыршыше, шашке дене чак кылым кучышо чолга спортсмен-влакын таҥасымашыштым туныктымо аланысе профсоюз толкын вуйлатыше В.С.Фёдоров почо. Эн сай тыланымаш дене кажне участникым пашагорныш вераҥдыш. Ий гыч ийыш тӱҥ судьян сомылжым уло Морко кундемлан палыме чолга айдеме Г.А.Муравьёв шукта. Геннадий Александровичын виктарымыж дене таҥасыше-влакын пашаштат путырак вияҥын шога. Весымат шекланен кертына: кодшо ийысе таҥасымаш дене таҥастарымаште тений шукырак школ гыч толыныт. Тидыже Валерий Семёнович ден Геннадий Александровичын тыршымашыштын сай лектышыж нерген ойла.
Кыдалаш школ-влак коклаште 1-ше вер дене Морко посёлкысо 1-ше №-ан школ (Семёнов Р., Николаева Л.) палемдалтын. 2-шо верым Зеленогорский школ (Михайлов В., Александрова Е.) налын. 3-шо вер Морко поселкысо 6-шо №-ан школлан (Васильев Н., Иванова Н.) пуалтын.
Пеш сайын модыныт моло школын командышт-влакат: Кокласола лицей (Семёнов Г., Сабирова Р.), Арын школ (Александров В., Семёнова Е.), Морко посёлкысо 2-шо №-ан школ (Иванов А., Матвеева Л.), Нуж-Ключ школ (Семелин В., Герасимова С.) А тӱҥ школ коклаште сеҥышыш Шӱргыял школын командыже (Алексеев А., Сергеева А.) лектын. 2-шо верым Кумыжъял школ (Иванов В., Яковлева Х.) налын. 3-шо вер дене Кожлаер школын командыже (Степанов В., Печникова А.) палемдалтын. Моткоч чолган модыныт Купсола (Цветников Л., Никитина Л.) да Шордӱр школ-влакын (Дмитриев Л., Горшкова Д.) командышт.
Кажне таҥасымаш ончыкылан вий-куатым ешара. Чынак, профсоюз — мыланна илыш дене тӧр каяш полыш кидым шуялтен шуктышо тӱҥ эҥертыш. Туныктышо-влаклан шке вий-куатыштым профессионал таҥасымаште тергаш йӧным ышта. Морко кундемыштына туныктымо аланыште тыршыше-влаклан эртаралтше шашке таҥасымаш моткоч сай шарнымашым коден. Ты мероприятийым ий гыч ийыш эртарен шогымыштлан ме В.С.Фёдоровлан, тӱҥ судья Г.А.Муравьёвлан да чыла участник-влаклан тау мутым каласена.
Елена Григорьева, Шӱргыял школ пеленысе профсоюз ушем вуйлатыше.
