Жап эртыме семын ийготна эрта. Полмезе пагытна эртымеке, кугемына. Кугеммеке, шижынат огына шукто, шоҥгемашат тӱҥалына. Тошто пагытым шарнымаш шочмо верна, ял дене кылдалтын. Коклан-коклан, кеч вучышо нигӧ уке гынат, ме тушко миен лектына. Кеч теле ма, кеч кеҥеж лийже ялышкына пурен, эн йӧратыме вернам ужын, шинчаштына йоча годсо сӱретым ужына. Теве тиде пӱя курык гыч ече, издер дене мунчалтенна, ял воктенсе изи эҥерыштына шокшо кеҥеж кечын йӱштыл киенна. Шыже шумеке, тиде урем дене лу-латвич еҥ дене погынен, школышко вашкенна. Игече йӱкшемден, лум вочмеке кудывечылашке, пӧръеҥ-влакын сӧсна когартымашыштым ончаш вашкенна. Мыланна тунам чылажат оҥайын чучын. Кызытат мый тиде пӱя корем, тиде урем дене шуэн гына, южо теле кечын, эртедем. Но курык гыч ынде, очыни нигунамат мунчалтен ом воло, сӧсна когартымым ужам гынат, ялмарий-влак дене саламлалтам веле , ончен ом шого, пуста урем дене умбакыже ошкедем.
