26 декабрьыште 14 шагатлан Йошкар-Оласе Усталык ушем пӧртыштӧ Марий Элын калык писательже В.Абукаев-Эмгак лӱмеш ыштыме поро кумылым ончыктышо «Ший памаш» фондын 2018 ийыште самырык-влаклан увертарыме сылнымут конкурсшым иктешлыме. А кастене М.Шкетан лӱмеш театрыште драматургым, прозаикым, поэтым да публицистым шарныме кас лийын, «Алиса, Анфиса, Аниса» спектакль ончыкталтын.
«Ший памаш» фондлан негызым пыштыше, кокымшо ранган капитан, военный специалист, писатель, В.Абукаев-Эмгакын тунемшыже Василий Владимирович Краснов самырык-влаклан премийым кудымшо гана кучыктен. «Тений ты мероприятий моло ийласе деч ойыртемалтеш, — каласен Василий Владимирович. – Конкурс Вячеслав Абукаев-Эмгакын лўмгечыжлан пєлеклалтын. Ила ыле гын, тудлан 60 ий темеш ыле. Тидлан Санкт-Петербургысо монетный дворлан «Вячеслав Абукаев-Эмгак» шарнымаш медальым лӱмын ыштын лукташ йодынам. Чыла закон почеш ышталтын, тидым удостоверений пеҥгыдемда. «Ший памаш» фондын эртарыме сылнымут конкурсышто чыла ийласе сеҥыше-влаклан, тыгак марий сылнымутым, марий йылмым вияҥдаш полшышо-шамычлан, Абукаев-Эмгакын пашажым аклыше-влаклан тиде медальым да тудын удостоверенийжым кучыктенам.
Вячеслав Абукаев-Эмгак чыла жанрыштат сайын возен. Тудын возымо почеламутшо, ойлымашыже-влак виян, оҥай, мыскара шўлышан улыт. Пьесыже-влак негызеш Марий драме да Самырык-влаклан театрлаште шуко спектакльым шынденыт. Тылеч посна Вячеслав Александрович уста журналист лийын. Арам огыл сылнымут конкурсна поэзий, прозо, эн сай журналист паша, эн сай теле-радио паша да эн сай драматический произведений номинацийлаште эртаралтеш. Чаманен каласыман, самырык-влак коклаште сай марий драматург уке. Садлан тений тиде номинацийыште иктымат палемден огынал. Марла почеламутым да ойлымашым, очеркым возышо самырык ўдыр-рвезе-влак шагалеммыла чучыт, ала пашаштым калык ончыко лукташ, конкурслашке пуаш аптыранат. Тидыже кумылым волта. Самырык еҥлан чолга лийман, ончыко кайыман, марий улмыда дене кугешныман. Марла мутланыман, газет ден журналым, книгам лудман. Кажне марий йоча «Ямде лий» газетым налшаш. Каласынем: «Ямде лий» газет редакций да «Ший памаш» сылнымут фонд йоча-влаклан «Рвезе йӱк» конкурсым эртарат. Уста, сайын возышо икшыве-влакым премий дене палемдена.
Але марте поэзий номинацийыште сеҥыше-влак лийыныт ыле, тений тиде номинацийыште иктыланат премийым пуэн огынал.
«Эн сай прозо» номинацийыште Алевтина Богданова ойыртемалтын. «Эн сай теле-радио паша» номинацийыште Наталья Ямаева сеҥен, а «Эн сай журналист паша» номинацийыште – Вероника Мустаева ден Евгения Ёлкина.
Самырык еҥлан творчествыштыже кушкашыже, вияҥашыже полшаш манын, «Ший памаш» фонд ышталтын. Мый шке жапыштыже Вячеслав Александрович деч сылнымутым возымо шотышто кугу полышым налынам. Тудын тунемшыже улам манын кертам. Почеламутым, прозым але статьям возаш тўналше самырык ўдыр-рвезе-влаклан кугурак опытан коллегышт деч каҥашым йодаш ида ӧр. Мый палем, нунылан, мыят кертмем семын, уло кумылын полшена, йоҥылышым ончыктен, возымаштыда чын тєрлаташ туныктена»
Наталья Ямаева, «Эн сай теле-радио паша» номинацийыште сеҥыше:
«Ший памаш» фондын эртарыме конкурсыш мый кундемнам чапландарыше, шке пашаштышт кугу кӱкшытыш шушо, лӱмлӧ еҥ-влак нерген возымо интервьюм аклаш луктынам. Мутлан, герольдмейстер, Российын сулло сӱретчыже Измаил Ефимов, Марий Элын сулло юристше, тӱҥ судебный приставлан лу ий пашам ыштыше Валерий Осипов, опер мурызо Эльвира Гурьева дене да тулеч моло нергенат. Тыгак тӱрлӧ жанрыште ямдылыме видеоматериал-влакым – тале спортсменке Римма Пальцева нерген очерк, «Марипарк» хореографий сынан постановко нерген репортаж, самырык марий дизайнер Алина Хорошавина нерген видеозарисовкым – конкурсыш колтенам.
Ты конкурсым 2013 ийыште икымше гана увертареныт. Тунам мый ава лияш ямдылалтынам, сандене конкурсыш ушнен омыл. Варажым йоча дене шинчыме годым сылнымут конкурсын вияҥ толмыжым эскеренам да тунамак «Пашашке лектам да мыят шке вием терген ончем» манын шоненам. Тений тиде шонымашем шукталтын. Видеоматериал-влакым комиссийын еҥже-влаклан аклаш луктынам да сеҥышыш лектынам. Кунам шке коллективыште пашам ыштет да пашатым сайын аклат. Тиде – икте. Но кунам иктаж-могай конкурсышто тиде аланыштак тыршыше вес специалист дене таҥасет да туным ончылтен кает – йӧршеш вес паша. Ты конкурсын могай пайдаже? Икымше: тудо самырык-влак коклаште эртаралтеш. Сандене профессионал семын кушкаш сай йєным ышта. Ончыкыжымат сай деч сай пашам ямдылаш шулдырым шочыкта. Кокымшо: окса премийын кугытшат пеш куандарыше. Чыным ойлаш гын, тачысе кечын республикыште ик конкурсымат ом пале, куштыжо тынар оксам пуат. Да эн тӱҥжӧ – тудым лӱмлӧ еҥна, марий талешкына Вячеслав Абукаев-Эмгакым шарныме лўмеш эртаралтеш. Конкурсым тудын тале тунемшыже Василий Краснов негызлен. Умбакыжат поро пашажым шуяш Юмо тазалыкым пуыжо, да тиде сылнымут конкурсын ӱмыржӧ кужу лийже, шуко у лӱм дене палдарыже!