9 Май – Сеҥымаш кече – пайрем годым кӧм шарналтеда? Тендан ешыште Кугу Отечественный сар годым бойышто кредалше але тылыште тыршыше-влак лийыныт? Шарнымаш илыже манын, кызыт мом ыштеда?
Лариса Антропова, Шернур район Чылдемыр тӱвыра пӧртым вуйлатыше:
– Мыйын кочам Никита Григорьевич Норкин Кугу Отечественный сарыште лийын. 1942 ийыште каен да 1946 ийыште пӧртылын. Орден ден медальжат пеш шуко ыле. Берлин марте шуын. Кажне ийын 9 май кечын ме тудым чылан порын шарналтена, кушкын шогышо тукымланна кочана нерген шуко сайым гына ойлена. Кочана шкенан район Пӱнчерйымал ялыште шочын, тыштак колен, 60 ийым темен шуктен огыл. Колхозышто учётчиклан, бригадирлан ыштен.