Шарнымаш да ойганымаш кече

Валентина Семёнован фотожо.

22 июнь 1941 ий — Кугу Ачамланде сарын икымше кечыже.

81 ий ончыч Совет Союзышто илыше 200 миллион калык шучко сар тӱҥалме нерген пален налын. 1418 кече мемнан калык лӱддымын кучедалын. Кажне еҥ эрык верч тыршен: салтак-влак оружийым налын, фронтыш каеныт; завод да фабрикласе пашаеҥ-влак йӱдшӧ-кечыже фронтлан кӱлеш арверым ямдыленыт; «Чыла фронтлан! Чыла эрык верч!» лозунг почеш тыршеныт, чыла сатум передовойыш колтеныт; журналист-влак кредалмаш каен шогымо верлаште лийыныт, уверым возеныт; артист-влак концерт дене коштыныт, салтак-влаклан кӧргӧ вий-куатым ешарен, кумылаҥден шогеныт,…

Ынде 2009 ий гыч 22 июньышто шарнымаш сортам чӱктат, Кугу Сеҥымашым кондышо ветеран-влакым шарналтат.

Марий Эл кундемнат тиде акцийыш ушнен. 21 июньышто рӱдоласе Сеҥымаш бульварыште Воин-влакын чапышым шарныктыше стела йымалан йӱлышӧ сорта-влак дене «Йошкар-Ола помнит» мутым возеныт.

Таче Йошкар-Олаште 4 шагатлан Курымашлык тул воктеке верысе калык пеледыш аршашым пыштен.

12:15 шагатлан Российысе калык вуйым савен, сареш колышо-влакым ик минут шып шоген шарналтеныт.