Марий Элыште Сеҥымаш кечым кумдан палемдыме.
Эн ончычак Йошкар-Олаште Шочмо элым аралыше-влакым Марково шӱгарлаште иза-шольо шӱгарла воктене шарналтыме. Тусо плиталаште 800 утла салтакын лӱмжым возымо. Нуно Кугу Отечественный сар годым вуйым пыштеныт.
Воин чап мемориал воктене мемнан эрыкна верч колышо Герой-влакым шарналтеныт. Тыште Марий Элым Вуйлатыше Ю.Зайцеват лийын. Тудо республикыште илыше ветеран, тылын труженикше да погынышо еҥ-влакым саламлен, Российысе калыкын подвигше тукым-влакым уша, патриотизмым шочыкта да Шочмо элым йӧраташ, у сеҥымашке шуаш ӱжеш манын.
Тыгак ушештарен: Марий кундем гыч Кугу Отечественный сарын фронтлашкыже 140 утла тӱжем еҥ каен, кажне кокымшыжо мӧҥгыжӧ пӧртылын огыл. «Кызыт исторический фактым вашталтылыт, Российын фашизмым сеҥымыж шотышто кокытеланаш таратат. Мемнан задачына – нацистский идеологий ваштареш шогаш, историйын чынжым ончыкташ, самырык тукым коклаште неофашизмын шонымашыжым шараш пуаш огыл!» – каласен Юрий Зайцев.
Тыгак Сеҥымаш кече дене Российысе «Боевое братство» мер организацийын республикысе пӧлкажым вуйлатыше В.Белоусов ден Йошкар-Оласе да Марий Элысе митрополит Иоанн саламленыт.
Вара Воин чап мемориал ден Курымашлык тул воктеке пеледышым пыштеныт.