80 ий ончыч мемнан элнан историйыштыже эн шучко сар тӱҥалын. Марий Элат Кугу Сеҥымашым лишемдашлан кугу надырым пыштен. Шочмо эл верч марий кундем гыч 130 тӱжем утла еҥ кредалын, шукын мӧҥгӧ пӧртылын огытыл.
22 июньышто, сар тӱҥалме кечын, Марий Элым вуйлатыше Александр Евстифеев Воин Чап монумент да Курымашлык тул воктене вуйым савен, пеледышым пыштен.
«Таче илыше-влакын порысышт – совет салтак нерген шарнымашым аралаш. Нунын подвигышт нигунам ок мондалт. Тылыште тыршыше-влакат Сеҥымашым лишемдаш шуко тыршеныт. Мемнан тачысе тӱҥ пашана – экономикым вияҥдаш, моло регион да эл-влак дене кылым вияҥдаш. Элна виян гын, мемнан деке сар дене керылташ шонышо ок лий», – каласен Александр Евстифеев.
