Бюджет гыч тынар оксам Марий Элым вуйлатыше Александр Евстифеев пандемийым чактараш колтен – документыш кидпалым пыштен.
Тышеч 30 миллион теҥгем медицине пашаеҥ-влакым аралыше средствым налаш колтат, 25 миллион теҥгем – вирусым чактараш препаратым налаш. Эше кум миллион теҥгеж дене тест-системе-влакым налыт.
Поснак кугу тӱткыш вакцинацийлан ойыралтеш. Шучко черым тӱшка иммунитет гына чактарен кертеш, а тидлан, шонен шогыде, вакциным ыштыктыман. Марий Элыште тидлан 110 стационарный да 74 мобильный пункт пашам ыштат.