Кугу Отечественный сарын участникше-влакым шарныме лӱмеш 22 июньышто Курыкмарий районысо Йоласалыште «Герой землякна-влакын аллейышт» мемориал комплексым почыныт. Тыгак Йошкар армийын капитанже Вениамин Игнатьевич Ивановлан памятникым шогалтеныт.
Ты поро пашам Карелий Республикысе «Марийцы Карелии» мер организацийын инициативыж почеш илышыш шыҥдарыме. Ончыкыжым комплексым кугемдаш шонат. Тушто Совет Ушем Герой Феофан Григорьевич Радугинлан памятникым, Афганистанысе, Чечнясе кофликт-влак годым да Спецоперацийыште вуйым пыштыше салтак-влакым шарныктыше обектым вераҥдат.
В.Иванов III степенян Кутузовын орденже, Йошкар Тистын орденже, I степенян Отечественный сарын юбилейный орденже дене палемдалтын. Сарыште тудо икымше кече гычак кредалын, 1944 ийыште, нелын сусыргымек, отставкыш колтеныт. Сар деч вара Курыкмарий районым да Козьмодемьянск олам вияҥдыме пашаште тыршен. Райисполком вуйлатыше, «Ленин корнӹ» газетын редакторжо лийын.