\Марий Эл гыч СВО-н ветеранже-влак Игорь Иванов ден Евгений Азовцев Угарман кундемысе Шатки посёлкышто Ленинградым фашист-влак деч тӱрыснек утарыме кечылан пӧлеклалтше мероприятийыште лийыныт.
1942 ийыште ты посёлкыш Ленинград гыч йочапӧртыштӧ кушшо икшыве-влакым эвакуироватленыт. Нунын коклаште Таня Савичева лийын. Тудын вӱдымӧ дневникшым Нюрбернгысе трибуналыште нацизмын шуктымо осал пашаже-влакым титаклыме годым тӱҥ документ семын онченыт.
Кызыт Шатки посёлкышто Танян шӱгарже, мемориал комплекс да тудын лӱмжым нумалше тоштер верланеныт. Игорь ден Евгений нине верлам ончал савырненыт. Тыгак СВО тоштерын ик вер гыч весыш куснышо экспозицийже дене палыме лийыныт. СВО участник-влак спортын паралимпийский видше-влак дене показательный выступленийым онченыт. И.Иванов регион-влак кокласе патриотический муро фестивальыште сеҥыше да лауреат-влак дене пырля «Кубок Защитников Отечества» гала-концертыш ушнен. Тушто тудо шке возымо кок мурыжым йоҥгалтарен.