4 ноябрь — Калык-влакын икоян улмо кече. Тиде кечын 1612 ийыште калык ополчений Кузьма Минин ден Дмитрий Пожарскийын вуйлатымышт почеш Моско олам Польшысо интервент-влак деч утарен. Тыге Руш кугыжанышыште кужун шуйнышо пудыранымашлан мучашым пыштеныт. Ты кечым 2005 ийыште палемдаш тӱҥалме.
1943 ий 6 ноябрьыште совет фронтын войскаже генерал Николай Ватутинын командованийже почеш наступательный операций годым Киев олам фашист-влак деч утарен.
1941 ий 7 ноябрьыште Моско олаште Йошкар площадьыште Октябрь революцийын 24-ше идалыкше лӱмеш военный парад эртаралтын. Ты мероприятийым ышташ шолып ямдылалтыныт да «Моско гарнизонысо войскан операцийже» лӱмым пуэныт. Ты парад Моско верч кредалмаш годым эртаралтын да салтак-влаклан вийым пуэн, сеҥымашлан кумылаҥден.