1916 ий 4 июньышто Икымше тӱнямбал сар годым Алексей Алексеевич Брусиловын вуйлатымыж почеш руш войска-влак австро-венгрий войска-шамыч ваштареш наступленийым тӱҥалыныт. Историйыште тудо «Брусиловский прорыв» семын палыме.
Операций кайыме жапыште 8 тӱжем наре офицерым, 400 тӱжем наре изи чинан салтакым пленыш налыныт. Тыгак 500 утла орудийым, 1,5 тӱжем пулемётым, 400 наре миномёт ден бомбомётым, 25 тӱжем квадрат кумдыкым поген налыныт.
«Брусиловский прорыв» операций кайыме годым руш войска-влак тушманын 70 меҥге наре оборонжым шалатеныт. Тидыже сарын ончыкылык действийжым тӱрыснек вашталташ йӧным ыштен.