Кажне ийын 27 январьыште элыштына Ленинградым фашист-влак деч тӱрыснек утарыме кечым палемдат. Тений тидлан 80 ий лиеш.
Ты кечым Российысе воин чап кече семын 1995 ий 13 мартысе «О днях воинской славы (победных днях) России» федеральный закон дене келшышын пеҥгыдемдыме.
Ленинград верч кредалмаш 872 кече каен. Кугу Отечественный сарын историйыштыже тудо ик эн кужу кредалмаш лийын. Ты оласе калыкын да салтак-влакын илышыштым арален кодаш полшышо Ладога ерысе «Илышын корныжо» трассе курымеш калыкын чонышкыжо шыҥен. Ты корно дене продовольствий, кочкыш да моло сатум шупшыктеныт, калыкым да сусыргышо салтак-влакым эвакуироватленыт. 1944 ий 27 январьыште кастене Ленинградым тушман-влак деч утарымылан 324 орудий гыч лӱйкалыме салют лийын.
Санкт-Петербургысо судын пеҥгыдемдымыж почеш, блокаде жапыште ик миллионат 93 тӱжем наре еҥын ӱмыржӧ кӱрылтын.