21 ноябрьыште Пошкырт кундем Шаран районысо тӱвыра пӧртыштӧ «Ош пеледыш» калык фольклор ансамбль 35 ияш лӱмгечыжлан пӧлеклалтше пайремым эртарыш.
«Ош пеледыш» ансамбль районышто эртаралтше чыла мероприятийыште шке мастарлыкшым ончыкта. Марий ансамбльым юбилей дене саламлаш кугу уна-влак деч посна руш, пошкырт, татар да чуваш мер организаций-влакын еҥыштат толыныт, тӱрлӧ йылме дене мурен-мурен саламленыт. Тидыже Шаран районышто тӱрлӧ калыкын ваш келшен, икте-весым пагален илымым, икоян улмыштым ончыкта!
Ансамбль 1990 ийыште Усола клуб пелен шочын. Тудым чолга марий ӱдырамаш Людмила Шамыкаева вуйлата. Людмила Мурзабаевнам районыштына веле огыл, пӱтынь республикыште да моло кундемыштат сайын палат. Мурашат, кушташат тале. Эше кеч-могай мероприятийым устан да сылнын вӱда. Калык лӱмым нумалше коллективше чап лӱмым шке пашаж дене суленак: 35 ий жапыште шкенан республик мучко веле огыл, Марий Элын, Татарстанын ятыр районышкыжо миен коштын да сеҥымаш дене пӧртылын.
Кызыт ансамбльыш 15 еҥ коштеш. Нуно тӱрлӧ ял гыч улыт, коклаштышт – СВО-што улшо рвезе-влакын авашт, пелашышт,
библиотекарь, туныктышо, повар, почтальон, пенсионер-влакат. Нуно вургем, муро да куштымаш могырым Шаран вел поянлыкым репертуарыштышт аралат.
Лӱмгече касыште ансамбль ончышо-влакым ямле муро-влак дене куандарен. Погынышо-влакын шӱм-чоныштым «Йолдыз» образцовый куштышо йоча ансамбль марла куштымаш дене тарватен кертын. Куртетал ял гыч Виталий Мустаев, Тумбагуш гыч Аркадий Ситов, Шаран гыч Алмаз Зайдуллин, Андрей Соловьев сылне мурышт дене концертым сӧрастареныт. Чалмалы ял гыч «Ак каен» татар, Шаран гыч «Сударушка» руш ансамбль чоныш логалше муро дене да молат саламленыт. Кок шагатат пеле шуйнышо пайрем кас кажне ончышылан куан да кугешнымаш кумылым луктын.
Республикысе марий ансамбль-влак икте-весышт дене пеҥгыде кылым кучат. Пайремыште мӱндыр уна-влакат лийыныт. Ты кастене юбиляр-влакым саламлаш Бакале район гыч «Пеледыш», Краснокам район гыч «Пеледыш аршаш» коллектив- влак саламленыт.
Лӱмгече пайрем концертыште ансамбльын участникше-влакым чылаштымат таумут да чаптанык дене палемденыт. Пайрем, поро марий йӱла почеш келшымаш кандырам пунымаш – «тывырдык» куштымаш дене мучашлалтын.
«Ош пеледыш» ансамбльын ӱмыржӧ кужу лийже. Умбакыжат калыкым куандараш мастарлыкышт да вий-куатышт ешаралт шогыжо.
Галина Ахметшина.
Пошкырт кундем, Шаран район.