Интернетыште ВКонтакте соцкылыште «Марий мыскара» тӱшка шукерте огыл «шочын». Яков Тимофеев оҥай кӱчык ролик-влакым войза, тушто пуйто кок еҥ кутыра.
– Тыгай ролик-влакым сниматлаш шукертсек шонен коштынам. Тӱшкам ӱмаштак ыштенам, но эре ала-могай йӧнан жапым вученам. Вара ик еҥ каласен: «Тугай жапым вучет гын, нигунам вучен от шукто, ыштынет гын, кызытак тӱҥал», – ойла Яков.
Икымше роликым тудо кок тылзе ончычрак гына луктын. Кызыт тӱшкаштыже 900 наре еҥ уло. Яковлан кок эргыжат видео-влакым войзаш полша, поснак кугуракше кумылан.
Я.Тимофеев – Морко район Шап Унчо ялын шочшыжо. Йошкар-Олаште ила, пушеҥгым обрабатыватлыше ик предприятийыште латкум ий ышта. Яков весела, мыскара кумылан, шкенжым творческий шӱлышан еҥлан шотла. Артист койышыжо эше Унчо школышто тунеммыж годымак палдырнен. Ялыште концертым ончыктымо годым сценкылаште модаш йӧратен.
– Школышто тунемме годым сочиненийым возаш чотак келша ыле, мыланем тиде эре куштылгын чучын. Почеламутат шочын. Икмыняр ойлымашым серенам ыле, но иктыланат ончыктен омыл.
А кызыт мыскара вуйыш шкеак толын пура, мондаш огыл манын, вашкерак возен шындем. Темыже – илышыштынак, йырымваш ончалаш гына кӱлеш, – ойла Я.Тимофеев.
Я.Тимофеевын альбомжо гыч налме фото.