М.Шкетан лӱмеш Марий кугыжаныш драме театрыште Марий Эл Республикын 100 ияш пайремжылан пӧлеклалтше «Марий Эл кугыжанышлан 100 ий: историй йыжыҥ-влак да ончыко вияҥме корно» (100-летие государственности Марий Эл: исторические вехи и перспективы развития) лӱман шанче практик конференций эрта.
Тӱҥ докладым историй науко кандидат Марий кугыжаныш университетын Калыкле тӱвыра да тӱвыра кокласе кыл институтшын директоржо Родион Чузаев ыштен. «Марийская автономия: проект, проверенный временем» документ негызеш погымо материалыште Родион Иванович шуко оҥай факт дене палдарен. «Таче мыланна чыла вере марла мутланаш йӧн лийже манын, тунам талешкына-влак шоненыт да кугу пашам ыштеныт», – палемден Родион Иванович. Ты пашам шуктышо тунамсе интеллигент еҥ-влак 22-34 ияш гына лийыныт!
Марий калык пайремлан кум фильм ямдылалтын: «Нить судьбы», «Наследие Марий Эл» ончыкталтын, кумшым – «Сегодня Марий Эл» фильмым – практик конференцийыш погынышо-влак икымше ончышо семын акленыт. Тыгак ты фильмым таче 17 шагатлан МЭТР да ОТР каналлаште ончаш лиеш.