8 МАРТ пайрем вашеш палыме пӧръеҥ-влак деч пелашышт нерген каласкалаш йодынна.
Владимир Аптулаев, «Йошкин» ООО-н генеральный директоржо, радиовӱдышӧ:
– Ме Эва пелашем дене коктын ондакак кутырен келшенна ыле: мый шийвундылан мутым кучем, а тудо – сурт кокласе пашалан. Тудын тыршымыжлан кӧра мӧҥгыштӧ чыла паша сайын шукталтеш, пайрем годым веле огыл, тыглай кечынат мемнан ӱстембалне шыл ден пареҥган когыльо, тӱрлӧ запеканкым да моло тамле кочкышат уло. Йочана-шамыч (а тиде Яндияр, Онар, Эрвелина да Марислав) тӱрлым йӧратат, таче иктын йӧратыме кочкышыжо гын, эрла – весын, тыге черет почеш.
Пайрем кечын пырляк лияш тыршена. 8 Мартым тӱрлын палемдена: я кафеште, я кинотеатрыште, я курыкышто… А ешнан ты шотышто йӱлаже уло. Кажне гана пелашемлан шке лӱмем дене пеледышым пӧлеклем, йоча-шамычланат аваштлан пеледышым икте дене кучыкташ лӱмынак налын кондем.
Эва – мыйын ӱшанле эҥертышем. Кеч-могай шонымашем лектеш гынат, тудо эре «айда-айда, ыште» але «тыге сайрак» манын кумылаҥда. Могай мыйын пелашем? Чот чытыше, чыла шке кӧргыштыжӧ кучен моштышо, умылышо, полшаш тыршыше. Тидлан мый пелашемым чотак аклем!
Эльвира Терентьева.