Алина Прокопьева, марафоным куржталмаште чемпионко:
– 2023 ийыште ятыр марафоным куржынам, иктыштыже «Российын чемпионжо» лӱмым суленам. Тыгак Омскышто эртаралтше марафонышто икымше толынам, Москошто кумшо лийынам. Тылеч посна полумарафонлаште шкем тергенам. Эртыше идалыкыште чылаже вич тыгай таҥасымаште ӱчашенам, кажне гана пьедесталыш логалынам. Шукерте огыл эше ик куан увер тольо – 2023 ийыште Белгород кундемыште олимпийский спортын куштылго атлетике дене эн тале спортсменже лийынам. Чыла тидыже ончыкыжат сайын тренироватлалташ, шонымашке шуаш кумылым шочыкта. Ынде Российыште эртаралтше олимпийский модмаш-влаклан ямдылалташ тӱҥалам. Ӱшанем, чылажат сай лиеш. Йӧратыме марий калыкемлан у идалыкыште чыла сайым веле тыланем. Ме пашалан кожмак, шке вийлан ӱшаныше улына, садлан нимогай неле-йӧсӧ мемнам чактарен огеш керт. Тек эре тыге лиеш!