Марий Элым Вуйлатышын стипендийжым тений вузлаште, ссузлаште тунемше 59 студент ден аспирант налеш. Нуно сайын тунемыт, тӱрлӧ конкурсышто, олимпиадыште ойыртемалтыт, шанче, усталык да мер пашаште, спортышто сеҥымашыш шуыт. Ноябрь тӱҥалтыште нуным иктеш погымо да кажныжлан дипломым кучыктымо.
Йошкар-Олаште шочын-кушшо, МарГУ-што юридический факультетыште 2-шо курсышто тунемше Полина Михеева тений икымше гана тыгай стипендий дене палемдалтын.
Врач, архитектор, юрист…
Полина лывырге капкылан, усталык шӱлышан кушкын, моткоч кушташ йӧратен. Кум ияшак эстраде куштымашыш кошташ тӱҥалын.
Тудо Йошкар-Олаште М.В.Ломоносов лӱмеш лицейыште, варажым Экономико-правовой гимназийыште тунемын. Чонлан келшыше ончыкылык профессийым шканже эре кычалын. 9-ше классыште тудо юрист лияш кумылаҥын.
– Мый врач, варажым маркетолог, архитектор лияш шоненам. Тукымыштем юрист шуко уло. Сандене нунын семынак, ты профессийым ойырен налаш манын, МарГУ-шко тунемаш пуренам. Вузысо, шкенан факультетысе мер пашашке чолган ушнем, волонтёр семын тыршем, – мане П.Михеева.
Шымла, статьям воза
Вузышто Полина шанче пашалан кумылаҥын. Тудо Нижний Новгородышто, Озаҥыште, Чебоксарыште, Йошкар-Олаште эртаралтше тӱрлӧ кӱкшытан шанче мероприятийыш, конференцийыш кумылын ушнен, шуко гана ончыл верышке лектын. Мутлан, профессор Н.И.Петренко дене пырля возымо статьяже «Вестник Российского университета коопераций» шанче журналыште савыкталтын. Тачылан Полинан шуко чапкагазше погынен. Нуно ӱдырын паша лектышыжым пеҥгыдемдат.
П.Михеевам юридический факультетыште тунемше-влакын советышкышт ойырымо. Полина студент-влакын шанче-шымлыме пашашт да куштымаш направленийлам вуйлата.
– Шанче пашам сайын каяш тӱҥалме дене тидлан эше утыр кумылаҥынам. Опытан наставник-влакын полшымышт дене наукышто тыршаш куштылго да оҥай. Тидын шотышто профессор Николай Иванович Петренколан поснак тауштем. Тудо икымше шанче вуйлатышем, тӱҥалтыште мыланем полшен, шанче шымлыме пашам виктарен.
Факультетыште тӱрлӧ шанче мероприятийым: конференцийым, уш-акылым пойдарыме модышым – эртарымылан мый вуйын шогем. Тыгак 1-ше курсышто тунемше ӱдыр-рвезе-влаклан статьям возаш полшем. Университетыште «Голос юности», «Студенческая весна» фестиваль-влак кажне ийын эртаралтыт. Мый ӱдыр-рвезе-влаклан куштымашым шындем, – ойла тудо.
Тыршен тунемше ӱдырым тений 1-ше курсышто тунемше ик группын кураторжылан ойыреныт.
Паша лектышлан – стипендий
Полина МарГУ-н чапшым нӧлта. Шанче пашаште сай лектышыш шуэш, чолгалыкше дене ойыртемалтеш. Тыгодым моткоч сайын тунемеш. Тидым шотыш налын, тудлан Марий Элым Вуйлатышын стипендийжым ойырымо.
– Марий кугыжаныш университетыште 11 студент тыгай стипендийым налеш. Юридический факультет гыч мый шкетын гына налам. Чонлан сайын чучеш. Тидыже у сеҥымашыш шуаш, ончыко каяш кумылаҥда, – каласыш П.Михеева.
Полина вузысо илышлан уло жапшым ойыра. Ончыкылан тудо магистратурыш тунемаш пураш да тыгодым пашам ышташ шона. Ӱдырын шонымашыже тӱрыснек шукталтеш да сай специалист лиеш манын ӱшанена.