2-10 октябрьыште Самара областьыште селаласе школлаште тунемше-влак коклаште шахмат дене Российысе таҥасымаш эртен.
Тушко элнан 26 регионжо гыч 234 шахматист (163 рвезе, 71 ӱдыр) ушнен. Лично-командный ӱчашымаш-влак индеш тур гыч шогеныт. Нуно швейцарийысе системе почеш эртеныт. Абсолютный зачётышто Марий Элысе Медведево районын командыж гыч Кирилл Лесовщиков сеҥен. Тынарак очком (7,5) Алтай крайын командыж гыч рвезе поген. Но К.Лесовщиковын модмыжым кӱкшынрак акленыт. Кумшо верым Татарстан Республик Актаныш районын командыж гыч рвезе налын.
Команде дене зачётышто икымше верыш Татарстан Республик Актаныш районын командыже, кокымшыш Марий Эл Медведево районын командыже, кумшо верыш Удмуртий Республик Малопургинский районын командыже лектыныт.
Марий Элын чапшым аралыше Медведево районын командыж гыч Д.Мингазов ден Д.Рыбаков сай результатым ончыктеныт. Рвезе-влак командылан модмыштлан кумшо вер дене палемдалтыныт. А шахмат композиций шотышто решенийым приниматлен моштымаште Д.Мингазов поснак ойыртемалтын.