13-28 апрельыште Москошто шахмат дене Российын первенствыже эртаралтеш. Тушто 11 гыч 19 ияш марте ийготан-влак коклаште 1222 еҥ модын. Марий Элын чапшым А.Иванов дене М.Волков араленыт. 17 ияш марте рвезе-влак коклаште Максим Волков блиц-турнирыште Российын вице-чемпионжо лийын, элнан эн тале 127 шахматист коклаште кокымшо верым налын. 27 апрель марте рапид, классике дене турнир-влак шуйнат. Икымше ден кокымшо верым налше-влак тӱнямбал але Европысо чемпионатлашке каят.
Шахмат уш-акылым пеҥгыдемдаш полшышо спортлан шотлалтеш, поснак йоча-влаклан пайдале. Максим шахмат дене модаш ныл ийым эртымекак тӱҥалын. Тидлан рвезым коваже Лидия Михайловна Скворцова кумылаҥден. Тудо уныкаж дене пырля кугу олалашке да таҥасымашлашке чӱчкыдын коштын.
Ончычшо Максим Йошкар-Оласе «Олимп» школышто Н.Дегтярёва, А.Винокуров, А.Степулёв дене тренироватлалтын. Максим тунам арнялан кум-ныл гана школышто заниматлен. Кушмо семын занятий-влак чӱчкыдынрак лийыныт. Тыге рвезе республикысе, российысе таҥасымашлашке лекташ тӱналын. Тидын нерген аваже тыгерак шарналтыш:
– Икымше гана Максим 2015 ий мартыште Нижний-Новгородыш миен. Тунам тудо вич ияш лийын. Шке ийготан-влак коклаште нылымше верым налын. Тылеч вара моло олалашкат лектеденна. Российын кубокшо верч таҥасымашын этапше-влак тӱрлӧ вере эртаралтыныт. Шахматист-влак модмышт годым баллым погат, ты балл почеш Российысе этаплашке лекташ шканышт корным почыт. Ме эргынан лектышыжым ужынна, садлан чыла вере участвоватлаш тыршенна. Этаплаште шуко баллым погышо шахматист-влак тӱнямбал таҥасымашке лектын кертыт.
Максим Россий кӱкшытыштӧ шке ийготан-влак коклаште шкенжым эреак сайын ончыктен. 2018 ийыште Российысе таҥасымаште сеҥымек, элнан чапшым Испанийыште арален (тушто кумшо вер дене палемдалтын), 2019 ийыште Китайыште лийын. Ты ийынак тудо спорт мастерыш кандидатлан нормативым шуктен. Изирак-влак коклаште Максим шке рейтингшым кӱшнӧ кучен, чыла гаяк таҥасымашлаште сай результатым ончыктен. Варажым кугурак ийготан-влак коклаште таҥасаш тӱҥалын. 2022 ийыште Челябинск олаште эртаралтше турнирыште рвезе ФИДЕ (FD) мастерыш нормативым шуктен. Тушто тудо 2300 марте баллым поген, рейтингшым нӧлталын. Кызыт Максим тӱнямбал кӱкшытан мастерлан (IM) икымше балжым поген. Ты званийым налаш, кум баллым погыман. Вара спортсменлан мастер лӱм пуалтеш.
Тӱнямбал чемпионат-влаклан Максим Российын эн тале шахматистше Сергей Шипов дене тренироватлалтын. Тылеч вара Новосибирск область гыч тренер, гроссмейстер Дмитрий Бочаров дене онлайн заниматлаш тӱҥалын. Шахмат — спортын пеш оҥай видше, садлан моштымашым нӧлташ, уш-акылым пойдараш чот тыршыман.
Анастасия Олеговна эргыжын шуаралтмыж шотышто тыгерак палдарыш:
– Мемнан, шахмат дене модде, ик кечат ок эрте. Уло ешна модеш. Тыгодым кажне шке сомылжым шукта. Максим вуйым пудыратыше задаче-влакым эре решатла. Тыге уш-акыл пÿсемеш. Ончычшо сборыш чÿчкыдын лектын коштын. Тылеч посна онлайн шуко заниматла.
Коваже Лидия Михайловна Скворцова тыге ойла:
– Икымше гана таҥасымашке лекмым тачат сайыт шарнем. Тунам уныкам улыжат вич ияш ыле, моткоч тургыжланыме. Но Максим шахмат дене модаш моткоч йӧратен, сандене талырак шахматист-влак дене ӱчашаш эреак кумылан лийын. Тыгодым тудо сеҥашак тыршен модын. Мый кугурак еҥ семын тудлан ит вашке, чылажымат шонен ыште манын ойленам. Шукыж годым тудо эре тыге ыштен. Икмыняр ганаже сеҥалтынат, тунамже тидын деч посна спортышто огеш лий манын умылтаренам. Ме шукыж годым тренер-влак деч посна кугу олалашке лектын коштынна гын, йоҥылышыжым моло тренер-влак дене лончыленна, – мане тудо.
Шахматист М.Волков Йошкар-Оласе 7-ше номеран школын 8 «В» классыштыже тунемеш. Ончыкыжым рвезе гроссмейстер марте кушнеже. Тидланже тудын чыла шотышта йӧнжӧ, тӱҥжӧ – кумылжо уло. Статистикылан эҥерташ гын, шахмат дене модшо икшыве утларак ушан, жапым кучылт моштышо, ответственный, сайын тунемше кушкеш. Максимын койыш-шоктышыжо лачшым тыгай.