
МВД-н данныйже почеш, Российыште 2024 ийыште 1 911 300 утла осал пашам регистрироватлыме. Тидыже тылеч ончычсо ий дене таҥастарымаште 1,8 процентлан шагалрак. Осал паша 57 кундемыште шагалемын, а 40 вере неле да поснак чот неле осал паша шагалрак ышталтын. Но тыгодым ик кундем весе деч чотак ойыртемалтеш. Эн шагал осал паша ондакысе семынак Чечняште лийын: 10 тӱжем еҥлан шотлымаште – улыжат 17. Кокымшо верыште –Ингушетий (37), кумшышто – Дагестан (43). А эн чот осалланымаш Карелийыште, Ненец АО-што да Алтайыште палемдалтын. Тушто 10 тӱжем еҥлан шотлымаште 200 утла осал паша ышталтын.
Марий Эл 61-ше верым айла. Тыште 2024 ийыште 10 тӱжем еҥлан шотлымаште 158,7 осал паша лийын. Кодшо ий дене таҥастарымаште 28 процентлан ешаралтын. Неле да поснак чот неле осал пашан показательже – 43,5. Тидыже 2023 ий дене таҥастарымаште 11 процентлан шукырак.