Зоя вузын эн мотор студенткыже ыле. Весела, йолташ-влак дене кылым муын моштышо, ушан ӱдыр. Тудо ятыр рвезын чонжым йӱлалтен.
Зоя ик курсышто пырля тунемше Виталиклан келшымыж нергенат пален, но ӱдыр тудым йолташ семын веле ужын. Виталик тудлан пеледыш аршашым чӱчкыдын пӧлеклен, кинош але театрыш коштыктен. Йолташ деч моло лийын огына керт манын, Зоя рвезылан эреак шижтарен, но тура ойлаш лӱдын.
14 февральыште Виталик ӱдырын мӧҥгыжӧ толын да тудлан марлан лекташ йодын. Зоям, мутат уке, рвезын ты койышыжо ӧрыктарен. Тудо кок тӱрлӧ еҥ улына, ешым тыгай еҥ-влаклан чумыраш неле манын умылтараш тыршен. Но Виталик пуйто нимом колын огыл. Ӱдыр – тудын пӱрымашыже, садлан мыланна пырля лийман, кутырен. Мутланыме годым рвезе магийым кучылтын моштымыж нерген ойлен. Тылеч вара Зоя рвезым мӧҥгыж гыч лектын каяш йодын. Тыге ыштымыжлан Виталик сыра манын шонен, но тудыжо, мӧҥгешла, шыргыжалын веле. Рвезе ӱдыр почеш коштмым чарнен. Варажым Виталикын койышыштыжо Зоя сотарымашым веле ужын.
Нуно университетым шукертак тунем лектыныт, выпускник-влакын вашлиймашыштым икмыняр гана эртареныт. Ик курсышто пырля тунемме ӱдыр-рвезе-влак шукертсек ешан, йочан лийыныт. Зоя веле шкетын коштын. Рвезе-влак дене келшаш тӱҥалын гын, эрлашыжымак ойырлен. А Виталикын кузерак илымыжым иктат пален огыл. Жап эртымеке, тудо Виталикын магийым кучылт моштем манмыжым вуйыштыжо чӱчкыдын пӱтыркален. Ала тудо ӱдырым локтен? Тыге Зоя мужедше деке каяш шонен пыштен.
Мужедше ӱдырамаш шке семынже ала-мом ойлен да Зоялан солыкым пуэн, тудо шӱведыме манын. Эрдене, мален кынелмеке, шӱргым леве вӱд дене шӱалташ да солык дене ӱшташ кӱштен. Ӱдыр тудын ойлымыж семынак ыштен.
Тылзе гыч Зоямыт деке рвезе пашаш толын. Тудлан ӱдыр вигак келшен. Икмыняр жап гыч ешым чумыреныт, икшыве-шамыч шочыныт. Ынде выпускник-влакын вашлиймашыштышт Зоя моло семынак шке пелашыже да икшывыже-шамыч нерген каласкален.
Катя О.
Морко посёлко.