Опытан пашаеҥ
Людмила Васильевна Жеребцова У Торъял районысо «Первый Май» озанлыкыште шӧр качествым тергыше специалистлан 2010 ий годсек пашам ышта. Лач тунам тудын ыштыме Торъял ӱй-сыр заводым банкрот семын петыреныт.
Тушто мастерлан, технологлан да лабораторийым вуйлатышылан 1981-2010 ийлаште тыршен. Такшым Людмила Васильевна Мордовийыште шочын да распределений почеш Марий кундемыш логалын.
Опытан пашаеҥым «Икымше Май» озанлыкыште лабораторийым почаш ӱжыныт. Иктаж еҥым тидлан туныкташ ойленыт. Кызытеш Людмила Васильевнам каныш годым алмаштат, но чумыр пашам вуйлаташ кӧнышӧ уке.
Ты озанлыкыш мийыме годым шке шуктымо пашаж дене тыгерак палдарыш:
– Лабораторий – ферме ден налше еҥ кокласе фильтр. Тыште ме ГОСТ-лан келшыдыме шӧрым писын муына. Вет посна кажне ферме гыч иктыш шӧр толеш гын, уда шӧр кушеч толмым кычалаш логалеш. А ме тыште чыла эскерена. Там, тӱс да пуш шотышто оргонолептический показательым палемдена. Физико-химический показательлан ӱйын процентшым, кислотностьым, вишкыдылыкым, арулыкым, температурым висена. Тыгак бактерий шотышто микробиологический анализым ыштена. Тылеч посна мастит, антибиот дене 80 тонн шӧрым Шернур сырзаводыш колтена.
Лабораторийыште шӧр качествым тергат. А тидыже доярке деч шога, вет тудо перчатке дене пашам ыштышаш, ик ганалан йӧршӧ салфеткым кучылтеш.
Холодильникыш шӧр кок гана эрыкталтын да йӱкшыктаралтын толеш. Тидак сай качествылан полша.
Чаплӱмым пашаж дене сулен
Шӧрым тергыме пашам Л.В.Жеребцова кумылын шукта, ситыдымаш нерген жапыштыже озанлык чатыште палдаренак шога. Пала: тиде кугу сомылышто йоҥылыш лийман огыл – сай шӧр верч тыршымаш деч озанлыкын лектышыже шога.
Кодшо кечылаште Российын Президентше Владимир Путин ялозанлыкым вияҥдымашке надырым пыштымыжлан Л.В.Жеребцовалан «Россий Федераций ялозанлыкын сулло пашаеҥже» почётан лӱмым пуымо нерген Указым луктын.
Чаплӱм дене алал кумылын саламлена! Пашада ончыкыжымат ушныжо да куандарыже!
Эльвира Терентьева.