Козьмодемьянск оласе лицейым тений вич тунемше шӧртньӧ медаль дене тунем пытарен. Нунын кокла гыч иктыже – Курыкмарий район Келгарам ялеш шочшо, Козьмодемьянск олаште кушшо Анна Кисельникова. Илышыште шке шонымашке шуаш тыршыше, ончыко кайыше, чолга ӱдыр. Районысо, республикысе олимпиадылаште ончыл верлам чӱчкыдын налын.
Слётышто – кок гана
Аннан изиракше годым ешыже Козьмодемьянск олашке илаш куснен. 1-9-ше класслам 1-ше №-ан школышто тунемын, 10-11-ше класслам – лицейыште. Ӱдырын аваже Людмила Леонидовна Кисельникова – курыкмарий йылмым туныктышо, 1-ше №-ан школышто тӱҥалтыш класслам вӱда. Ачаже районысо «Водоканал» предприятийыште тырша. Ешыште чыланат курыкмарла кутырат. Шочмо йылмым ӱдыр изинек сайын пала, умыла, но пешыже ок мутлане.
Анна изинек тунеммылан шуко жапым ойырен. Школышто шукылан пример лийын.
– Мый пеш ответственный улам. Мӧҥгысӧ пашам эре жапыштыже ыштенам,
Мыланем гуманитарный предмет-влак келшеныт, историйым, обществознанийым куанен тунемынам.
1-ше №-ан школышто 5-ше класс гыч кадет классыште тунемынам, патриотический мероприятийлашке чӱчкыдын ушненна. Мутлан, 2017 ийыште школ команде дене Москошко кадет класс-влакын военно-патриотический слётышкышт миенна. Уш-акылым пойдарыме состязанийыште (литератур, руш йылме, логике дене) 2-шо верым налынам ыле. Вес ийынже Санкт-Петербургыш кадет-влакын «Кадетское содружество» тӱнямбал слётышкышт коштынна. Тушто математике, физике, руш йылме дене олимпиадылаште 2-шо верым суленам. Слётлаште ме Российын историйжым тунемынна, тӱрлӧ тоштерыш коштынна.
Лицейыш куснымеке, социально-экономический профиль дене шинчымашым налаш тӱҥалынам. Тушто экономике ден правом келгын тунемынна, – мане А.Кисельникова.
Олимпиадыште сеҥыше
Аннам шуко олимпиадыш колтеныт. Историй, обществознаний, экономике ден право, ИКН дене олимпиаде-влакын районысо йыжыҥыштышт эре ончыл верлам налын. Тений обществознаний, право, историй да ИКН предметла дене олимпиаде-влакын республикысе йыжыҥыштышт призёр лийын.
– Пытартыш ийлаште гуманитарный направленийлан кугу тӱткышым ойыраш тӱҥалынам, вет тудын дене ончыкылыкем кылдаш шонем. Российын историйжым ончычат йӧртенам, тачат моткоч йӧратем. Сандене ИКН дене олимпиадылан ямдылалташ куштылго лийын. Марий кундемын да Российын историйже икте-весе дене чак кылдалтыныт. Тидын шотышто лицейыште ИКН-ым туныктышо Марина Леонидовна Кармазиковалан таум ойлем, вет тудо мыланем сайын ямдылалташ полшен,
– ойла ӱдыр.
Моло вереат чолга
Кугурак класслаште Анна волонтёр пашамат изиш шуктен. Лицейыште эртыше икмыняр мероприятийым эртараш полшен.
Пытартыш ийлаште лицейын командыж дене пырля интерактивный викториныш онлайн йӧн дене ушнен. Тудо Российын историйже, Кугу Отечественный сар дене кылдалтын. Пытартыш гана командышт республикыште икымше верым налын.
2019-2020 ийлаште «Молодые профессионалы» регионысо чемпионатыште «Предпринимательство» компетенцийыште ик ӱдыр дене пырля икымше верыш лектын.
Яра жапше годым Анна книгам лудеш, музыкым колыштеш да сериал-влакым онча.
Школ илыш дене чеверласен, А.Кисельникова вашке студент пагытыш кусна. Тудо юристлан тунемаш пураш ямдылалтеш. Сандене ӱдырлан ончыко каяш да сеҥымашыш шуаш тыланена!