24-27 июньышто Польшысо Познань олаште вӱдыштӧ байдарке да каноэ иймаш дене Европын первенствыже лийын. Тушто байдарке да каноэ иймаш дене Российын сборныйжо таҥасен. Волжск олаште шочыш-кушшо Артём Коровин шӧртньӧ медальым сеҥен. Сентябрьыште сборный дене пырля тудо Португалийыште эртыше тӱнямбал первенствыште таҥасаш тӱҥалеш.
Тренер ешыште кушшо рвезылан спорт – куаным кондышо сомыл. Волжск оласе 12-ше №-ан школ деч вара Олимпийский резерв училищыште тунемын, кызыт Озаҥ оласе Поволжский спорт академийыште шинчымашым налеш. Байдарке да каноэ иймаш спорт дене шуко ий заниматла. Шкеже Марий Элысе спорт рӱдерыште – инстурктор.
«Тушто 2016 ий годсек пашам ыштем. Марий Элын чапшым аралем. Ты таҥасымашлан чот ямдылалтме. Сеҥымаш вучыдымо ыле. Европын первенствыштыже 35 эл гыч спортсмене-влак таҥасеныт. Кум этап: ончылгоч заезд, полуфинал да финал – лийын. Ме заездыште сеҥышна да вигак финалышке лекна. 500 метрым ийме. Кокымшо верышке поляк, кумшо верышке испанец-влак лектыныт. Чот куаненна. Тидлан мыланна пӱжвӱдым чот йоктараш, тыршаш логалын», – ойлыш спортсмен.
Ынде тудо тӱнямбал первенствышке каяш ямдылалтеш, чот заниматлалтеш. Вет спортын ты видше куштылго огыл, поснак кид ӱнар шуко кӱлеш. Рвезе турникыште шуко гана нӧлталтеш, куржталеш да байдарке дене иеш.